Sjúkraliðar veikir vegna langtímaálags

Sjúkraliðar lýsa yfir miklum áhyggjum af því ástandi sem er í heilbrigðiskerfinu og vísa þar sérstaklega til aðbúnaðar aldraðra. Gunnar Örn Gunnarsson, framkvæmdastjóri Sjúkraliðafélags Íslands, gagnrýnir harðlega það ástand sem er inni á hjúkrunarheimilunum og segir alltof fáa sjúkraliða vera við störf.

„Í öllu þessu fjársvelti hafa hjúkrunarheimilin frekar ráðið ófaglærða. Jafnvel fólk sem talar ekki íslenska tungu. Því miður hefur landlæknir gefið grænt ljós á að ófaglærðir gefi vistmönnum á hjúkrunarheimilum lyf sem að okkar mati er algjörlega út úr korti og býður hættunni heim. Eftirlit landlæknis er ekki meira en það. Það er alveg þekkt að það hafi skapað hættu,“ segir Gunnar.

Hann segir félagið margsinnis hafa bent á þann vanda sem nú sé kominn upp og eigi sér langan aðdraganda. Sjúkraliðum fækki, laun séu léleg og álag aukist stöðugt. Það skili sér í því að langtímaveikindi hrjái fjölda sjúkraliða sökum langvarandi vinnuálags.

„Við erum aðilar að styrktarsjóði BSRB þar sem fólk getur sótt um dagpening eftir að það hefur klárað veikindaréttinn. Stór hluti þeirra sem sækja um dagpeninga í þennan sjóð er sjúkraliðar.“

Gunnar segir álag hafa aukist mikið undanfarin ár, sérstaklega á hjúkrunarheimilum fyrir aldraða.

„Heimilin eru meðal annars farin að bregðast við með því að láta fólk mæta á svokallaðar stubbavaktir þar sem álagið er mest og launin minnst. Þá mætir fólk í nokkrar klukkustundir. Þannig að einhver vitræn hjúkrun eða umönnun fer ekki fram, þú ert bara á sprettinum. Einhvers staðar eru menn meira að segja búnir að taka upp hlaupahjól til þess að fara hraðar á milli,“ segir hann og ítrekar að undir slíku álagi bitni það á faglegri umönnun.

Gunnar segir sjúkraliða forðast að vinna á hjúkrunarheimilum fyrir aldraða og vilji frekar vinna á spítölum. „Fólk er að færa sig yfir í hjúkrun sem er meira vit í og meira faglegt. Þeir hafa sem betur fer vandað sig í að hafa faglært fólk á spítölunum.“

Á fundi Sjúkraliðafélagsins í fyrradag sömdu félagsmenn ályktun þar sem þeir hvetja stjórnendur heilbrigðisþjónustunnar til að leita allra leiða til að fjölga í sjúkraliðastéttinni, meðal annars með hækkun launa, með því að auka jákvæðni gagnvart stéttinni og hvetja markvisst ófaglærða starfsmenn og ungt fólk til þess að mennta sig í faginu.

Einnig að hlúð verði að heilbrigðisstarfsfólki og byggt upp kröftugt, faglegt heilbrigðiskerfi sem þjóðin getur verið stolt af til framtíðar.