Gúglaði hættur þess að hlæja of mikið

„Við erum að fara á hátíð sem hefur verið haldin í sautján ár. Þetta eru 72 klukkutímar af spuna í sjö leikhúsum,“ segir Dóra Jóhannsdóttir, listrænn stjórnandi spunaleikhópsins The Entire Population of Iceland.

Hópurinn leggur land undir fót í júní og ferðast til New York þar sem hann mun sýna á Del Close-spunahátíðinni hjá UCB-leikhúsinu þar í borg. En á hátíðinni sýna margir af kunnustu gamanleikurum og handritshöfunum Bandaríkjanna.

Sýningarnar eru sýndar allan sólarhringinn í 72 klukkutíma samfleytt og því hægt að lenda á sýningartíma hvenær sem er dagsins en hópurinn hafði svo sannarlega heppnina með sér.

„Við verðum á sama sviði og Amy Pohler sem er í næstu sýningu á eftir okkur. Ég var svolítið hrædd um að við myndum fá spott klukkan fimm um nóttina. En við fengum besta spottið sem er fyndið,“ segir Dóra glöð í bragði.

The Entire Population of Iceland er sprottið upp úr leikfélaginu Improv Iceland sem æfir saman spuna undir stjórn Dóru en hún hefur lært langspuna síðastliðin ár í UCB-leikhúsinu í New York.

Hún segir mikið stuð vera á æfingunum en á miðvikudaginn kom til landsins spunakennarinn Christian Capozzoli sem þjálfa mun hópinn fyrir ferðina og einnig halda vinnubúðir sem opnar verða öllum áhugasömum.

Á spunahátíðinni heldur hópurinn klukkutímasýningu sem unnin er upp úr einu orði frá áhorfanda en Dóra segir spunann ógnvænlegt og ótrúlega skemmtilegt form. 

„Það er svo mikið kikk að vera í svona klikkaðri óvissu. Að standa bara á sviði og vita ekkert hvað maður er að fara að gera,“ segir hún og bætir við: „Spuninn er algjörlega ávanabindandi, þegar maður byrjar í þessu þá getur maður ekki hætt.“

Hópurinn er fjölbreyttur og stendur saman af alls konar fólki sem hefur áhuga á því að koma fram en ekki endilega vera leikarar. Meðal annars eru leikarar, leikstjórar, tónlistarmenn, verkfræðingur, sundlaugarvörður og frístundakennari og Dóra segir svo mikið fjör á æfingum að hún hafi óttast um heilsu sína sökum hláturs.

„Ég hlæ svo mikið að stundum hef ég fengið áhyggjur. Ég hef í alvöru komið heim og gúglað hvort það sé líkamlega hættulegt að hlæja svona mikið af því mér fannst þetta svo mikil áreynsla,“ segir Dóra skellihlæjandi og bætir við: „Mér fannst ég bara vera að sprengja einhverjar æðar og hugsaði með mér að þetta gæti ekki verið hollt.“ Henni hefur þó ekki orðið meint af hlátrinum og hún hlakkar mikið til að halda utan og halda áfram með spunanámskeiðin.

The Entire Population of Iceland efnir til fjáröflunarsýninga í Þjóðleikhússkjallaranum í kvöld og næstkomandi föstudag. Aðgangseyrir er 2.000 krónur og eru sýningarnar klukkan 19.00 og 21.00.