Vélum fjölgaði um 12,5 prósent milli ára

Flogin vegalengd í íslenska flugstjórnarsvæðinu á síðasta ári samsvarar 4.644 ferðum umhverfis jörðina, að því er fram kemur í nýjum tölum frá Isavia.

Þá fjölgaði vélum sem hér fóru um flugstjórnarsvæðið um 12,5 prósent milli ára, voru 130.856 í fyrra. Flognir kílómetrar voru 11,1 prósenti fleiri.

Fram kemur að á árinu 2014 hafi yfir 130 þúsund flugvélar flogið 186 milljónir kílómetra um íslenska flugstjórnarsvæðið. Farþegum í millilandaflugi fjölgaði um fimmtung (19,9 prósent) á meðan innanlandsfarþegum fækkaði um 2,8 prósent á sama tímabili.

„Farþegafjöldi á Keflavíkurflugvelli var alls 3.867.418 sem er 20,5 prósenta aukning frá fyrra ári. Umfang vöru- og póstflutninga minnkaði um 1,5 prósent innanlands en jókst um 1,3 prósent milli landa,“ segir í tilkynningu Isavia.

Mikill hluti flugumferðar er vegna ferða milli Evrópu og Norður-Ameríku, en um íslenska svæðið fer um fjórðungur þeirrar flugumferðar. „Algengasta leiðin innan flugstjórnarsvæðisins var sem fyrr frá London til Los Angeles en 2.181 ferðir voru farnar þá leið á árinu.“

Þau sjö flugfélög sem oftast flugu um íslenska svæðið eru Icelandair, United Airlines, Delta, British Airways, Lufthansa, Emirates og SAS, að því er fram kemur hjá Isavia.