Bjarni vill skoða hvort tilefni sé til skaðabótakröfu á hendur slitabúi Kaupþings eftir Al-Thani dóm

Bjarni Benediktsson, efnahags- og fjármálaráðherra, segir tilefni til að skoða hvort 500 milljóna evra neyðarlán Seðlabanka Íslands til Kaupþings í kjölfar Al-Thani fléttunnar sé tilefni til skaðabótakröfu ríkisins gegn slitabúi Kaupþings. Þetta kom fram í svari Bjarna við fyrirspurn Guðmundar Steingrímssonar, þingmanns Bjartrar framtíðar á Alþingi í dag.

Hæstiréttur felldi sem kunnugt er dóm yfir fjórum fyrrverandi stjórnendum og hlutaeigendum síðastliðinn fimmtudag. Hreiðar Már Sigurðsson, fyrrverandi forstjóri Kaupþings, var dæmdur í fimm og hálfs árs fangelsi, Sigurður Einarsson, fyrrverandi stjórnarformaður í fjögurra ára fangelsi og þeir Magnús Guðmundsson, fyrrverandi forstjóri Kaupþings í Lúxemborg og  Ólafur Ólafsson sem var annar stærsti hluthafi bankans í gegnum eignarhaldsfélög sín, í fjögurra og hálfs árs fangelsi.

Með dómi Hæstaréttar á fimmtudaginn var staðfest að um sýndarviðskipti hefði verið að ræða með sölunni á hlutinum til Al-Thani.

Hvers vegna er ekki hægt að treysta svörunum?

Guðmundur spurði Bjarna út í neyðarlánið sem Seðlabanki Íslands, undir forystu Davíðs Oddssonar sem formanns bankastjórnar, veitti Kaupþingi í kjölfar kaupa Al-Thani á 5,01% hlut í Kaupþingi. Taldi Guðmundar tíma til kominn að birt yrði símtal Davíðs við Geir Haarde, þáverandi forsætisráðherra, í aðdraganda þess að lánið var veitt. Öll kurl væru ekki komin til grafar varðandi fall bankanna fyrr en það lægi fyrir.

Sjá einnig:Fullyrðing Bjarna um trygg veð í besta falli umdeilanleg

„Hvers vegna ekki bara að spyrja þá sem í hlut áttu og Seðlabankann,“ svaraði Bjarni. Sagðist hann ekki skilja hvers vegna ekki væri hægt að treysta þeim svörum sem fram hefðu komið.

„Sérstaklega þegar öllum er ljóst að stjórnvöld gerðu allt sem í þeirra valdi stóð til að bjarga fjármálakerfinu og hagsmunum Íslendinga eins og aðstæður leyfðu,“ sagði Bjarni og bætti við:

„En að sjálfsögðu á þingið rétt á að fá skýringar og ég tel reyndar að þær séu komnar fram.“

Hafi gert allt sem þeir gátu

Bjarni benti á að lánið hefði ekki verið veitt til Kaupþings nema að fengnum veðum sem hafi þótt trygg á þeim tíma. Miðað við þau sem ríkisstjórnir og seðlabankar annars staðar tóku hefðu þau líklega verið býsna góð.

„Sérstaklega þegar öllum er ljóst að stjórnvöld gerðu allt sem í þeirra valdi stóð til að bjarga fjármálakerfinu og hagsmunum Íslendinga eins og aðstæður leyfðu.“

Bjarni sagði að menn ættu að gefa sér tíma til að lesa það sem skrifað hafi verið um atburðina í kringum hrun í öðrum löndum. Hér hefðu menn ekki látið stífar verklagsreglur þvælast fyrir réttum ákvörðunum eins og til dæmis í Bretlandi og Bandaríkjunum.

Bætti ráðherra við að honum fyndist birting símtalsins minna mál en það að skoðað yrði hvort að lánsveitingin til Al-Thani hefði gefið ríkinu viðbótartilefni til að veita lánið til Kaupþings. Og í framhaldinu mætti skoða hvort tilefni væri til bótakröfu af hendi ríkisins gegn slitabúinu.