Fagnar breyttu viðhorfi lögreglunnar til fíkniefna

Snarrótarsamtökin voru mætt á tónlistarhátíðina Sónar Reykjavík sem fór fram síðustu helgi til að passa upp á gestir hennar væru meðvitaðir um rétt sinn gagnvart lögreglunni. Ríflega 3.000 manns voru komnir saman til að hlusta á listamennina leika lög sín.

„Hátíðin í fyrra var upphafið að þessu átaki okkar en þar fór lögreglan algjöru offari,“ segir Björgvin Mýrdal, matreiðslumeistari og einn stjórnarmeðlima Snarrótarinnar. „Stórir hópar voru dregnir afsíðis og leitað á þeim án nokkurar heimildar.“

Sjá einnig:Á þriðja tug kærðir á Secret Solstice fyrir vörslu fíkniefna

„Lögreglan hefur í gegnum tíðina verið að misnota leitarheimildir sínar gífurlega og í raun verið að gabba fólk til þess að leyfa líkamsleit. Um helgina vorum við á staðnum og dreifðum spjöldum til að minna fólk á rétt sinn. Við urðum ekki varir við nokkuð. Fréttum af fáeinum óeinkennisklæddum lögreglumönnum en lögreglan virðist hafa séð að sér. Því ber að sjálfsögðu að fagna.“

Talsverð umræða skapaðist í kringum málið eftir Secret Solstice hátíðina. Þar var leitað á fjölmörgum og einhverjir verið sektaðir í kjölfarið. Björgvin segir þó undarlegt að margar sektanna hafi verið dregnar til baka og felldar niður.

„Þetta virðist vera algerlega ný lína hjá lögreglunni í fíkniefnamálum á hátíðum sem þessari. Hún kemur okkur talsvert á óvart en við erum hæstánægð með hana og fögnum að þeir hafi tekið gagnrýni okkar á þennan veg.“

Hann bendir einnig á að hátíðarhaldarar séu á milli steins og sleggju. Það sé erfitt að gagnrýna lögregluna þegar þú þarftað sækja um leyfi til hennar til þess að fá að halda viðburði. Smærri hátíðir hafi oft lent í stappi vegna þessa á meðan hátíð á borð við Iceland Airwaves hafi sloppið.

„Aukin gæsla á viðburðum kemur ekki í veg fyrir neyslu heldur breytir aðeins neyslumynstrinu,“ segir Björgvin. Maður sem ætli sér að neyta efna mun neyta þeirra. Gæslan gæti haft þau áhrif að fólk neyti stærri, og jafnvel hættulega stórra, skammta áður en á staðinn er komið í stað þess að dreifa þeim á lengra tímabil.

„Það er vonandi að næsta skref verði stigið alla leið. Á hátíðum úti þá eru lögreglumenn oft tveir og tveir saman íklæddir vestum í áberandi lit. Þar vilja þeir að fólk geti leitað til þeirra komi upp einhver vandamál. Hér eru lögreglumenn oft í stórum hópum og reyna að falla inn í hópinn. Það gagnast ekki nokkrum manni,“ segir Björgvin.

Uppfært: Björgvin vill koma því á framfæri að fyrirsögnin er villandi. Hann fagni ekki breyttu viðhorfi lögreglunnar til fíkniefna heldur breyttu viðhorfi hennar til mannréttinda.