Minna á mikilvægi bílbelta: „Ég missti tvær bestu vinkonur mínar“

Ása Sigurjóna Þorsteinsdóttir lenti í alvarlegu umferðarslysi 17 ára gömul þar sem tvær vinkonur hennar létust og Ása var sjálf í lífshættu í langan tíma. Engin þeirra þriggja var í öryggisbelti en ökumaður bifreiðarinnar, sem hafnaði á staur, var það og hann slasaðist ekki.

Í gær gaf Ása íslenska landsliðinu í fótbolta treyjur í samstarfi við Samgöngustofu sem hafa þann tilgang að vekja athygli á mikilvægi bílbelta.

„Við erum að afhenda íslenska landsliðinu treyjur sem eru táknræn mynd þess hversu mikilvægt það er að við notum öryggisbelti og að við notum þau alltaf og alls staðar,“ segir Einar Magnús Magnússon hjá Samgöngustofu.

Mikilvægt fyrir landsliðið að geta tekið þátt í svona verkefni

Í raun eru fáir sem nota ekki öryggisbelti hér á landi en þeir fáu eru tæplega helmingur þeirra sem létust í bílslysum á síðustu fimm árum.

„Fyrir fimm árum, árið 2010, þá lenti ég í alvarlegu bílslysi og ég missti tvær bestu vinkonur mínar og engin af okkur var í bílbelti. Ég var sú eina sem lifði. Mér finnst þetta því mjög mikilvægt, að nota bílbelti, og þess vegna er ég hérna,“ segir Ása Sigurjóna.

„Við erum auðvitað komnir í þá stöðu núna að það er mikil umfjöllun um landsliðið og mikil athygli á okkur eins og er. Þannig að ef við getum hjálpað eins og núna þá er það auðvitað mjög mikilvægt fyrir okkur,“ segir Gylfi Þór Sigurðsson, leikmaður íslenska landsliðsins.

Fólk lítur upp til landsliðsins

Ása segir landsliðið vera stolt Íslands og ef að það eigi að hlusta á einhvern þá eru það leikmenn liðsins.

„Litlir krakkar, og fólk bara almennt, lítur upp til þeirra. Þess vegna er svo mikilvægt að hafa þá með í þessu.“

Þetta vilja þau segja við ökumenn:

„Þetta er bara mjög einfalt. Þú vilt frekar vera á lífi en dáinn. Það er svo auðvelt að fara í beltið. Það tekur einhverjar tvær sekúndur og þú ert mikið öruggari í belti,“ segir Gylfi.

„Hugsið ykkur tvisvar um. Það tekur ykkur nokkrar sekúndur að láta bílbeltið á og það þarf ekki mikið til þess að eitthvað svona gerist eins og gerðist fyrir mig og svo marga aðra sem hafa lent í alvarlegum bílslysum,“ segir Ása Sigurjóna.



Fjallað var um málið í Íslandi í dag í gærkvöldi og má sjá innslagið í spilaranum hér að neðan.