Karl Garðarsson segir Fréttablaðið ganga flokkspólitískra erinda

Karl Garðarsson, þingmaður Framsóknarflokksins, dró upp dökka mynd af fjölmiðlum í ræðu sinni á þingi nú áðan í athyglisverðri ræðu. Karl segir fjölmiðlamenn marga hverja óvandaða; þeir telji fólki trú um að svart sé hvítt og allt sé í kalda koli. Hann telur fjölmiðla ganga erinda pólitískra afla og nefndi í því sambandi Fréttablaðið, Kjarnann og Stundina, auk Morgunblaðsins. Hann nefndi hins vegar ekki þá fjölmiðla sem tilheyra fjölmiðlasamsteypu Björns Inga Hrafnssonar í því sambandi, einhverra hluta vegna; DV, Eyjuna og Pressuna.

Sannleikanum hagrætt á sumum bæjum

Karl tók til máls í þinginu þegar rætt var um stöðu RÚV ohf. Ekki síst er athyglisvert að kynnast hugmyndum Karls í ljósi þess að sjálfur starfaði hann á árum áður sem fréttamaður, fréttastjóri fréttastofu Stöðvar 2 og ritstjóri Blaðsins sáluga. Karl hljóp fyrst yfir þau ógnarmiklu áhrif sem hann telur fjölmiðla hafa á vitund og skoðanir fólks.

„Virðulegi forseti. Völd snúast ekki síst um að stjórna umræðunni í þjóðfélaginu. Þeir sem stjórna henni eru í lykilstöðu þegar kemur að mótun almenningsálitsins. Við búum í litlu þjóðfélagi þar sem fjölmiðlar eru fáir. Og oft á tíðum máttlausir. Í slíku samfélagi getur verið auðvelt að ná dagskrárvaldi, stjórna umræðunni – ná völdum. Telja fólki trú um að hvítt sé svart og allt sé í kalda koli. Með því að hamra á ákveðinni möntru verður til nýr sannleikur. Skoðanir okkar mótast aðallega af fjölmiðlum, því sem við sjáum og heyrum. Við tökum á móti upplýsingum, metum þær og drögum ályktanir. Ef við heyrum nógu oft sömu fullyrðingarnar verða þær oft að nýjum sannleika,“ sagði Karl og ekki hægt að skilja hann öðru vísi en svo að margir fjölmiðlamenn stundi það að snúa rækilega uppá sannleikann:

„Íslenskir fjölmiðlamenn sinna flestir starfi sínu vel og eins vel og þeir geta. Þeir eru þó jafn misjafnir og þeir eru margir. Halda menn til dæmis að Morgunblaðið eða Fréttablaðið haldi ekki fram ákveðnum pólitískum skoðunum, eða gildum? Halda menn virkilega að netmiðlar eins og Kjarninn og Stundin hafi ekki pólitískt agenda?“ Athygli vekur hvaða fjölmiðla Karl tiltekur í þessu samhengi, og hvaða fjölmiðla ekki.

Frekir og háværir einstaklingar drekkja umræðu á samfélagsmiðlum

„Og það er í sjálfu sér ekkert að því. Fjölmiðlar í einkaeigu hafa fullt leyfi til að hafa pólitískar skoðanir „Það er hins vegar okkar alþingismanna að tryggja að sem flestar skoðanir fái að koma fram þannig að almenningur geti tekið upplýstar ákvarðanir ,“ segir Karl Garðarsson sem næst beindi sjónum að Facebook og öðrum samfélagsmiðlum. En, Karl lítur ekki svo á að það sé endilega lykill að lýðræðislegri umræðu.

„Samfélagsmiðlar þar sem allir geta tjáð sig leysa ekki nema að litlu leyti vandann. Þar verða gjarnan til hópar háværra einstaklinga sem reyna að stjórna og hafa sem mest áhrif á þjóðfélagsumræðuna. Raddir hinna verða undir.

RÚV nauðsynlegt mótvægi við peningamennina

Síðasta árið fyrir hrun var búið að skipta flestum helstu fjölmiðlum landsins á milli tveggja valdablokka. Annarri var stjórnað af Jóni Ásgeiri Jóhannessyni og hinni af Björgólfi Guðmundssyni. Viljum við að fjársterkir aðilar stjórni nær allri þjóðfélagsumræðu á Íslandi? Tryggir það að sem flestar skoðanir fái að njóta sín? Hér er minnst á þetta vegna þess að hér er hafin enn einu sinni umræða um framtíð RÚV. Nú er fréttastofa RÚV sannarlega ekki hafin yfir gagnrýni, en hvernig er upplýstri umræðu best borgið?“

Þar lauk ræðutíma Karls en ekki annað á honum að heyra að hann telji RÚV nauðsynlegt fyrirbæri til að sporna við fótum gegn öflum sem lagt hafa undir sig suma fjölmiðla og hinni bjöguðu umræðu sem hinir háværu og freku hafa náð tökum á á samfélagsmiðlum.