Birkir lék allan leikinn í sigri Basel í Póllandi

Birkir Bjarnason lék allan leikinn fyrir Basel sem vann 1-3 sigur á Lech Loznan í 3. umferð forkeppni Meistaradeildar Evrópu í kvöld.

Leikurinn fór fram á INEA stadion í Poznan í Póllandi, þar sem Stjarnan gerði 0-0 jafntefli við heimamenn í forkeppni Evrópudeildarinnar í fyrra.

Þetta var annar leikur Birkis fyrir svissnesku meistarana en hann lék einnig allan leikinn þegar Basel bar sigurorð af Grasshopper í svissnesku úrvalsdeildinni um helgina.

Staðan var 1-1 í hálfleik í Póllandi í kvöld en Marc Janko kom Basel í 1-2 á 77. mínútu og það var svo Davide Calla sem skoraði þriðja mark Svisslendinganna á annarri mínútu í uppbótartíma.

Basel er því í góðri stöðu fyrir seinni leikinn á St. Jakob-Park í Basel eftir viku.