Carragher: Varnarmenn Man City geta ekki hlaupið

Jamie Carragher, fyrrverandi leikmaður Liverpool og núverandi sparkspekingur á Sky Sports, var ekki hrifinn af varnarleik Manchester City í 2-0 tapinu fyrir Stoke City á laugardaginn.

Austurríkismaðurinn Marco Arnautovic skoraði bæði mörk Stoke í leiknum en varnarlína City leit illa út í báðum tilvikum.

„Það var nóg um letilegan varnarleik gegn Stoke. Með því á ég við að leikmenn nenni ekki að hlaupa. En ég sá merki um annað um helgina; leikmenn serm geta ekki hlaupið. Það gæti verið stærra vandamál fyrir City,“ sagði Carragher í þættinum Monday Night Football í gær.

„Bacary Sagna er að verða 33 ára og hann hefur spilað 26 leiki fyrir félagslið og landslið á þessu tímabili. Það lítur út fyrir að hann ráði ekki við það,“ sagði Carragher um franska hægri bakvörðinn sem átti slakan leik á laugardaginn.

Gamli Liverpool-maðurinn var heldur ekki hrifinn af frammistöðu miðvarða City, Argentínumannanna Martín Demichelis og Nicolas Otamendi.

„Miðverðirnir voru líka mjög slakir, sérstaklega Demichelis. Það hefur mikið verið talað um að City sakni Vincent Kompany en þetta hefur ekkert með það að gera,“ sagði Carragher.

„City á í vandræðum með unga og kraftmikla leikmenn sem stinga sér aftur fyrir vörnina þeirra. Þetta gerðist líka gegn Liverpool og Tottenham en Sagna, Demichelis og (Aleksandar) Kolarov spiluðu alla þessa leiki og þeir eru allir 30 ára og eldri.

„Þetta er viðvarandi vandamál hjá City og þeir þurfa að kaupa varnarmenn í sumar. Eliaquim Mangala er yngsti varnarmaðurinn þeirra og hann er ekki nógu góður,“ bætti Carragher við.

Eftir tapið um helgina er City í 3. sæti ensku úrvalsdeildarinnar, þremur stigum á eftir toppliði Leicester City.

City mætir Borussia Mönchengladbach í lokaleik sínum í D-riðli Meistaradeildar Evrópu í kvöld. Enska liðið er þegar búið að tryggja sér sæti í 16-liða úrslitunum og á enn möguleika á að vinna riðilinn.