Crowe valdi ruðningsliðið sitt fram yfir Óskarinn

Russell Crowe, nýsjálenski kvikmyndaleikarinn, ákvað frekar að verja tíma sínum á ruðningsvelli í Englandi heldur en á Óskarsverðlaunahátíðinni sem fór fram í Los Angeles í nótt.

Crowe er einn eiganda ástralska ruðningsliðsins South Sidney Rabbitohs sem vann yfirburðasigur á enska liðinu St. Helens, 39-0, í World Club Challange, nokkurs konar heimsbikarkeppni félagsliða í ruðningi.

Áströlsk lið hafa haft mikla yfirburði í þessari keppni síðastliðin ár og liðið hans Crowe þykir í dag besta lið heims. Honum stóð til boða að vera kynnir á Óskarsverðlaunahátíðinni í nótt en valdi þess í stað að vera á staðnum er lið hans varð heimsmeistari í fyrsta sinn í sögu félagsins.

Hann sá ekki eftir því. 39 stiga sigur liðsins er sá stærsti í sögu keppninnar.

Crowe hefur þrívegis verið tilnefndur til Óskarsverðlauna fyrir bestan leik í aðalhlutverki. Hann vann verðlaunin einu sinni - árið 2000 fyrir leik sinn í Gladiator.