Píratar gefast upp á Pírataspjallinu

„Þjóðarsálin: Pólitískt spjallsvæði áður þekkt sem Pírataspjallið. Viðhorf Pírata eru ekki endilega endurspegluð hér og engin stefnumótun á sér stað á þessum vettvangi.“

Svo hljóða skilaboð á nýrri opnumynd Facebook-hópsins Pírataspjallið sem Birgitta Jónsdóttir, þingmaður Pírata, setti inn fyrr í kvöld eftir að Vísir birti frétt um kýting, persónuárásir og almenna úlfúð inni á Pírataspjallinu.

Smári McCarthy Pírati hafði þá birt færslu á Pírataspjallinu þar sem hann sagði skynsemi drukkna í fávitaskap í umræðum á hópnum, sem telur nú nærri fimm og hálfa þúsund manns, og að margir stofnendur og upprunalegir meðlimir Pírata væru hættir að nenna að taka þátt í umræðunum.

Í ummælum við frétt Vísis skrifar Birgitta að spjallhópurinn hafi verið endurnefndur um stund vegna þess að þeir aðilar sem láti hópinn um þessar mundir loga í illdeilum eigi ekkert skylt við Píratahreyfinguna. Þau sem hafi tekið þátt í að stofna flokkinn séu að mestu horfin af þessum vettvangi.

Á opnumyndinni er þess getið að þeir sem vilja kynna sér stefnu Pírata eða ganga í flokkinn geta heimsótt vefinn piratar.is eða opinberu Facebook-síðuna piratar.island.