Eygló: Með harðsperrur í kinnunum

Eygló Ósk Gústafsdóttir átti erfitt með að lýsa ánægju sinni með bronsverðlaunin sín á EM í sundi þegar Vísir náði tali af henni í dag.

Hún var þá nýkomin af verðlaunapallinum eftir að hafa unnið brons í 100 m baksundi á EM í 25 m laug í Ísrael. Eygló er fyrst íslenskra sundkvenna til að vinna verðlaun á stórmóti í sundi.

Sjá einnig: Eygló Ósk vann brons á Evrópumótinu

„Ég er komin með harðsperrur í kinnarnar, ég er búin að brosa svo mikið,“ sagði Eygló og hló. Hún segist ekki hafa áttað sig á þegar hún tók síðustu sundtökin að hún væri að tryggja sér verðlaunasæti.

„Ég held að ég hafi þurft að horfa upp á töfluna í svona eina og hálfa mínútu til að trúa þessu og átta mig á því að ég hafi í alvörunni náð þriðja sætinu. Ég táraðist bara við það.“

Sterkasta grein Eyglóar er þó 200 m baksundið og segir hún að aðalmarkmið sitt hafi verið að vera á meðal fimm efstu í þeirri grein á mótinu. Keppt er í 200 m baksundi strax í fyrramálið og hefur hún því lítinn tíma til að jafna sig.

„Ég þarf eiginlega að drífa mig aftur í laugina til að synda mig niður,“ segir hún. „Ég þarf að slaka á og fara í nudd til að vera tilbúin á morgun.“

Sjá einnig: Besti árangur íslenskrar sundkonu

Engin undanúrslit eru í 200 m baksundi og því fara bestu átta sundkonurnar úr undanrásunum beint í úrslitin sem fara fram síðdegis á morgun.

„Ég held að ég eigi ekki eftir að átta mig almennilega á þessu fyrr en síðar í kvöld.  Nú þarf ég strax að byrja að einbeita mér að næstu grein,“ sagði hún en nánar verður rætt við hana og landsliðsþjálfarann Jacky Pellerin í Fréttablaðinu á morgun.