Mörg dæmi um sortuæxli vegna ljósabekkjanotkunar hér á landi

Íslensk kona, sem í sumar greindist með  krabbamein sem hægt er að rekja til ljósabekkjanotkunar á unglingsárum, biður fólk um að bjóða hættunni ekki heim með því að fara í ljós. Húðsjúkdómalæknir segir slík dæmi koma upp á hverju ári, en óvenjumörg sortuæxli greinast á Íslandi miðað við legu landsins.

Maren Ösp Hauksdóttir segir frá því í facebookfærslu sem hún skrifaði í vikunni að í sumar hafi hún farið til læknis í Englandi, þar sem hún býr, og greinst með sortuæxli. Hún vann á sólbaðsstofu þegar hún var unglingur og fór á þeim tíma tölu­vert í ljós og telur að hægt sé að rekja æxlið beint til þess.  

Læknar náðu að skera meinið burt svo Maren slapp með skrekkinn. Hún vonar að sín saga verði öðrum víti til varnaðar en Bárður Sigurgeirsson, húðsjúkdómalæknir, segir reynslu Marenar ekki einsdæmi. 

„Það eru ekki allir sem að fá sín mein eftir svona langan tíma. Sumir fá þau fyrr svo þetta dreifist en tengslin við ljósabekki eru langt frá því að vera einsdæmi. Við greinum slík tilfelli á hverju ári,“ segir hann.

Miðað við legu Íslands greinast óvenjumörg sortuæxli hér á landi. 

„Náttúrulega útfjólublá geislun er lág hér á landi, nema yfir hásumarmánuðina, þannig við ættum í raun ekki að hafa háa tíðni af sortuæxlum. Alþjóða krabbameinsstofnunin kom einmitt hingað fyrir nokkrum árum til að hjálpa okkur að rannsaka afhverju þessi tíðni er svona há á Íslandi, sérstaklega hjá ungum konum. Þar fundum við sterka tengingu við ljósabekkina. Þetta er rannsókn sem hefur vakið mikla athygli á alþjóðavettvangi og hefur verið mikið vitnað í,“ segir Bárður, en bendir þó á að notkun ljósabekkja sé nú um helmingi minni en fyrir tíu árum. 

„Það greinast sem betur fer heldur færri núna með sortuæxli heldur en fyrir nokkrum árum. Ég held að það megi rekja til aukinnar fræðslu,“ segir Bárður Sigurgeirsson.