Milos: Helst vil ég hafa bæði Róbert og Thomas

Milos Milojevic, þjálfari Víkings í Pepsi-deild karla í fótbolta, er hæst ánægður með að hafa landað Róberti Erni Óskarssyni, en markvörðurinn samdi við Víking til þriggja ára í dag.

Róbert Örn hefur varið mark FH síðan 2013 og varð Íslandsmeistari með liðinu í sumar. Hann var áður á mála hjá Víkingi árið 2011 en spilaði þá ekki leik.

Sjá einnig:Róbert: Ekkert skrítið að FH fékk til sín frábæran markvörð

„Ég er mjög ánægður með að fá Róbert. Það er frábært að fá svona góðan markvörð og hann verður frábær liðsstyrkur fyrir okkur innan sem utan vallar,“ sagði Milos við Vísi eftir undirskriftina í dag.

Daninn Thomas Nielsen varði mark Víkings á síðasta tímabili og tók miklum framförum, en samt fannst Milos nauðsyn að fá nýjan og betri markvörð.

99 prósent líkur á Túfa

„Ég var ánægður fyrir hans hönd, en í rauninni vantaði mig öðruvísi markvörð. Róbert passar fullkomlega inn í leikstíl okkar þannig þegar ég vissi að það yrðu hreyfingar á markaðnum hafði ég samband við Thomas,“ sagði Milos.

„Ég sagði honum hvað var að gerast þannig hann vissi alveg hvað gæti gerst. Draumur minn var að hafa þá báða í samkeppni, en hvort það verður kemur í ljós.“

Rolf Toft, danski framherjinn, kemur ekki aftur í Víkina en hvað um serbneska þríeykið; Milos Zivkovic, Igor Taskovic og Vladimir Tufegdzic?

„Við erum að vinna í hinum. Það eru svona 99 prósent líkur á því að Túfa komi aftur og svo er ég að fara út í byrjun desember að ræða við Igor og Milos. Ég stefni að því að hópurinn verði klár 1. febrúar,“ sagði Milos, en hvað finnst honum vanta í liðið?

„Það eru þrjár stöður sem við erum að leita. Það er miðvörður til að auka samkeppnina þar, skapandi miðjumaður og einn sóknarmann, helst vængmann.“

„Ég efast um að íslenskir leikmenn í þessar stöður losni eitthvað fljótlega. Ég er ekki að fara að bíða fram í maí og vona að einhverjir leikmenn komast ekki í liðið hjá KR eða FH. Ég sé okkur ekki fá íslenska leikmenn í þessar stöður þó ég myndi heldur kjósa það,“ sagði Milos Milojevic.