Margrét Lára: Unnustinn svolítil bæjarrotta

Margrét Lára Viðarsdóttir er að öllum líkindum á heimleið frá sænska liðinu Kristianstad. Hún sagði þó að hún ætti enn eftir að finna sér íslenskt félag en Margrét Lára var í viðtali í Akraborginni á X-inu í dag.

Margrét Lára, sem lék með ÍBV og Val hér á landi á sínum tíma, útilokar þó ekki að spila aftur erlendis ef spennandi tilboð kemur upp fyrir hana.

„Það lítur mikið út fyrir það [að ég sé á leiðinni heim]. Ég er búin að senda bílinn og gáminn heim. En ég er alveg til í að skoða að spila áfram ef eitthvað mjög sérstakt kemur upp. Það væri helst að taka eitt ár í einhverju ævintýralandi.“

„En ég er komin með hugann heim og ætla að finna mér einhvern góðan stað heima,“ sagði Margrét Lára sem segist ekki vita með hvaða liði hún ætlar að spila.

„Hjartað mitt er litað svörtu og hvítu með rauðu ívafi. Þau tvö félög [ÍBV og Valur] toga óneitanlega í en ég er tilbúin að skoða aðra möguleika og er búin að heyra í mörgum öðrum félögum.“

„Ég vil vera í umhverfi þar sem er mikill metnaður, þar sem fólk vill berjast um titla og þar sem ég fæ góða þjálfun. Ég er mjög metnaðarfull og er ekki að koma heim til að leggjast í helgan stein. Ég ætla að halda áfram að bæta mig.“

Hún segir að það væri annað mál ef unnusti hennar væri reiðubúinn að búa í Vestmannaeyjum. „Hann er svolítil bæjarrotta og gæti verið erfitt að toga hann þangað. En það má alltaf finna lausnir á öllum vandamálum.“

Viðtalið má heyra í heild sinni hér fyrir ofan.