Aðstoðarmaður ráðherra minnist kærastans sem kenndi henni að meta lífið

„29. júní situr alltaf þungt í hjarta mínu, þegar lögreglan hringdi, ég þurfti að færa þeirri sem elskaði hann mest fréttirnar og að fá fréttirnar á sjúkrahúsinu,“  skrifaði Þórdís Kolbrún Reykfjörð Gylfadóttir í stöðuuppfærslu á Facebook í gær um fyrrverandi kærasta sinn sem lést í hörmulegu vinnuslysi á Grundartanga fyrir fimm árum. Færslan er afar hjartnæm og í henni minnir hún á hversu mikilvægt það er að njóta lífsins og hætta að röfla.

„Takk fyrir tímann okkar og takk fólkið mitt fyrir að bera mig uppi þann tíma sem ég gat með engu móti gert það sjálf. Njótið, þakkið fyrir ykkur, hlæið, brosið og hættið að röfla. Við erum heppin að fá að taka þátt í lífinu.“

Kærasti Þórdísar hét Óskar Stefánsson og lést þegar sprenging varð í járnblendiverksmiðju Elkem á Grundartanga þann 29. júní 2010. Þetta er eina banaslysið sem orðið hefur þar frá því að verksmiðjan tók til starfa. Óskar hafði unnið hjá verksmiðjunni í tvö ár þegar slysið varð og var vanur og góður starfsmaður að sögn forstjóra Elkem á þeim tíma.

„Kennt mér á lífið, kennt mér að gagnrýna“

Óskar brenndist illa og lést af sárum sínum á gjörgæsludeild Landspítalans stuttu eftir slysið. Fimm manna rannsóknarnefnd á vegum Elkem rannsakaði hvað það var sem orsakaði sprengju í einum af þremur ofnum verksmiðjunnar.

Þórdís og Óskar voru saman í þrjú ár. Þórdís minntist hans í gær með miklum hlýhug.

„Nú eru fimm ár liðin frá því Óskar dó. Hann hafði verið kærasti minn í þrjú ár, kennt mér á lífið, kennt mér að gagnrýna,“ skrifaði hún en eins og hún bendir sjálf á þá er það mikilvægur hluti hennar starfs í innanríkisráðuneytinu að geta gagnrýnt. „Kennt mér að drekka rauðvín (sem ég elska), kennt mér að efast - sem er mjög mikilvægt, sérstaklega þegar maður vinnur með valdhöfum og í stjórnmálum.“ Þórdís tók við stöðu aðstoðarmanns Ólafar Nordal, innanríkisráðherra, nú í desember.

Erfitt að hugsa til dóttur hans

„Hann hafði skrítna trú á mér - og ég er honum svo þakklát fyrir tíma okkar saman. 29. júní situr alltaf þungt í hjarta mínu, þegar lögreglan hringdi, ég þurfti að færa þeirri sem elskaði hann mest fréttirnar og að fá fréttirnar á sjúkrahúsinu. Mér fannst erfitt að heyra nýtt lag með hljómsveit sem hann elskaði, lesa um nýjan bjór sem hann hefði átt að fá að smakka, líta til annarra landa sem hann hefði átt að fá að heimsækja og hugsa til dóttur hans sem hefði átt að fá að njóta hans.

En taki maður það góða þá skildi hann eftir sig svo margt gott og ég ætla að vera sjálfhverf og þakka fyrir það sem hann kenndi mér - því ég tók það allt til mín og þakka fyrir - á hverjum degi - fyrir son minn, fólkið mitt, tækifærin mín og líf mitt.“

Nú eru fimm ár liðin frá því Óskar dó. Hann hafði verið kærasti minn í þrjú ár, kennt mér á lífið, kennt mér að gagnrýna...

Posted by Þórdís Kolbrún Reykfjörð Gylfadottir on Friday, July 3, 2015