MSN komnir með meira en hundrað mörk saman á tímabilinu

Lionel Messi, Luis Suarez og Neymar brutu hundrað marka múrinn saman í fyrri hálfleik á móti Getafe í spænsku deildinni í kvöld.

Luis Suarez, Lionel Messi og Neymar skoruðu þrjú fyrstu mörk Börsunga í leiknum sem þýðir að þeir hafa skorað meira en hundrað mörk saman á leiktíðinni.

Suarez bætti við sínu öðru marki seinna í hálfleiknum og þar með féll félagsmet Lionel Messi, Samuel Eto'o og Thierry Henry sem höfðu skorað 100 mörk saman tímabilið 2008-09.

Spænska metið er hugsanlega í hættu en þeir Cristiano Ronaldo, Karim Benzema og Gonzalo Higuaín skoruðu 118 mörk saman tímabilið 2011-12.

Lionel Messi skoraði sitt annað mark í leiknum í upphafi seinni hálfleiksins og þar með 102. mark þrenningarinnar. Þeir eiga því enn eftir 16 mörk í metið.



Flest mörk hjá þremur mönnum í sama félagi á einu tímabili í spænsku deildinni:

118 mörk

Cristiano, Benzema og Higuaín fyrir Real Madrid 2011-2012

102 mörk [Eftir 50 mínútna leik í kvöld]

Messi, Neymar og Suárez fyrir Barcelona 2014-2015

100 mörk

Messi, Eto'o og Henry fyrir Barcelona 2008-2009