„Það er á ábyrgð okkar allra að #freethenipple-átakið snúist ekki upp í andhverfu sína“

Það fór vart framhjá neinum að íslenskar stúlkur héldu í gær upp á dag geirvörtunnar. Í skólum víða um land fengu brjóst að njóta sín til hins ýtrasta, sem og á samfélagsmiðlum, auk þess sem hópur stúlkna fór berbrjósta í sund í gærkvöldi.

Erfitt er að meta hversu margar konur birtu myndir af sér berum að ofan í gær og í fyrradag en ætla má að þær skipti hundruðum, ef ekki þúsundum. Markmiðið með myndbirtingunum var meðal annars að segja hefndarklámi stríð á hendur.

Þórdís Elva Þorvaldsdóttir, rithöfundur og fyrirlesari, er ein þeirra sem hefur unnið ötullega að því að fræða börn, unglinga og foreldra um hefndarklám og er hún afar ánægð með dag geirvörtunnar. Hún er í miðri fyrirlestrarröð sem stendur fram í júní og er stödd á Akureyri, þar sem hún hélt fimm fyrirlestra fyrir grunn- og framhaldsskólanemendur, foreldra og kennara í gær.

„Ég er afskaplega stolt og hrærð yfir því að það hafi tekist þarna fjöldahreyfing um það að líkaminn sé dásamlegt fyrirbæri sem við getum borið höfuðið hátt gagnvart.“

Hún segist samgleðjast öllum þeim sem upplifðu einhvers konar valdeflingu í tengslum við dag geirvörtunnar og öllum þeim hefndarklámsbrotaþolum sem hafa lent í því að brjóstamyndir af þeim voru notaðar gegn þeim og urðu að einhvers konar vopni.

Boltanum var hent á loft í gær

„Það eina sem ég vona að gerist ekki er að þetta verði olía á eld fólks sem vill snúa átakinu upp í andhverfu sína. Ef að það gerist að nektarmyndir verða notaðar á annan veg en þeim var ætlað þá hvet ég samfélagið til að takast á við það sameiginlega. Ég var rétt í þessu að ljúka heimsókn í kynjafræðitíma í VMA og við ræddum um að í gær hefði boltanum verið hent á loft af ótal hugrökkum konum sem vilja skora hlutgervingu og misrétti á hólm."

Þórdís segir að það sé nú á ábyrgð sem samfélags að grípa þennan bolta og standa með þessum konum alla leið.

„Ef einhverjir skemmdarvargar misnota þessar myndir og dreifa þeim yfir á vefsíður sem einkennast af drusluskömmun og kvenfyrirlitningu, þá er okkar ábyrgð að leyfa þeim ekki að snúa átakinu upp í andhverfu sína. Við þurfum að hafna þeirri hugmynd að nekt sé niðurlægjandi eða auðmýkjandi fyrirbæri sem nota má gegn annarri manneskju. Krafturinn í samtakamættinum er ómetanlegur og blæs mér bjartsýni í brjóst, í orðsins fyllstu merkingu. Bæði brjóstin, meira að segja.“