Verður Pettis risastjarna eftir bardagann í kvöld?

Anthony Pettis er ríkjandi léttvigtarmeistari UFC. Hann mætir Rafael dos Anjos um beltið á UFC 185 í kvöld en takist Pettis að ná sannfærandi sigri gæti hann komist á stall með stærstu stjörnum íþróttarinnar.

Jon Jones, Ronda Rousey, Conor McGregor, Anderson Silva og Georges St. Pierre hafa verið stærstu stjörnur UFC undanfarin ár. Þegar þessar stjörnur berjast beinast allra augu að þeim sem sést best á áhorfstölum ásamt auknum tekjum þeirra og UFC. Aðrir bardagamenn komast ekki á sama stall og fyrrnefndar stjörnur ef litið er til áhorfs en Anthony Pettis gæti komist skrefinu nær að komast í þann hóp í kvöld.

Anthony Pettis hefur allt til að verða risastjarna í íþróttinni. Bardagarnir hans eru spennandi þar sem hann tekur upp á ótrúlegustu hlutum í búrinu eins og sjá má á t.d. „Showtime“ sparkinu hans svo kallaða (sjá hér). Einnig klárar hann yfirleitt bardaga sína en hann hefur klárað 15 af 18 bardögum sínum með annað hvort rothöggum eða glæsilegum uppgjafartökum

Það má einnig taka það fram að hann er með áhugaverða sögu á bakvið sig. Faðir hans var myrtur þegar hann var 16 ára gamall og þurfti Pettis að sjá fyrir fjölskyldunni upp frá því. Í gegnum þrautseigju og seiglu hefur hann komist alla leið á toppinn í íþróttnni og það með stæl. Hann virðist líka vera góður drengur en eftir verðlaunaféð sem hann fékk fyrir að sigra sinn síðasta bardaga keypti hann hús og bíl handa móður sinni.

Allt þetta gerir Pettis að mjög áhugaverðum bardagamanni en frammistaða hans í búrinu skiptir þó öllu máli.

Það sem hefur haldið aftur af honum hingað til eru meiðsli. Síðan hann kom í UFC sem WEC meistarinn (minni bardagasamtök sem UFC keypti) árið 2011 hefur hann aðeins barist sex bardaga í UFC. Tíð meiðsli hafa haldið honum frá búrinu auk þess sem upptökur á The Ultimate Fighter raunveruleikaþættinum töfðu fyrir en þar var Pettis þjálfari.

Pettis segir að meiðslin séu á bak og burt og ætlar hann sér að berjast þrisvar á þessu ári - að minnsta kosti. Hann kláraði Gilbert Melendez í desember í fyrra og mætir nú Rafael dos Anjos í kvöld. Klári hann dos Anjos sannfærandi gæti hann orðið þessi risastjarna líkt og Rousey og Jones eru.

Auk Pettis verður nóg um að vera í kvöld. Carla Esparza mun verja strávigtartitil sinn í fyrsta sinn þegar hún mætir hinni pólsku Joanna Jedrzejczyk. Þá mun Johny Hendricks berjast í fyrsta sinn síðan hann tapaði veltivigtarbeltinu í fyrra og mætir hann Matt Brown í frábærum veltivigtarslag. Rotarinn með stóru bumbuna, Roy Nelson, mætir hollenska sparkboxmeistaranum Alistair Overeem og er ólíklegt að sá bardagi fari út fyrir fyrstu lotu.

Bardagakvöldið verður í beinni útsendingu á Stöð 2 Sport 3 og hefst útsendingin kl 2 aðfaranótt sunnudags.