Austur er og verður áfram opinn

Ásgeir Kolbeinsson, einn eigandi skemmtistaðarins Austur, segir það ekki vera rétt að rekstur staðarins sé ólöglegur. Kamran Keivalou hélt því fram fyrr í dag, eftir að sýslumaðurinn í Reykjavík sendi Ásgeiri ábendingu um að annað fyrirtæki geti ekki séð um veitingasölu á Austur.

Bréf sýslumanns var unnið upp úr ábendingu frá Kamran, sem Ásgeir segir að viti greinilega ekki hvernig starfsemi sé háttað í fyrirtækinu.

„Það eina sem er rétt í þessu er að sýslumaðurinn sendi bréf og hann gerði það á föstudaginn,“ segir Ásgeir Kolbeins í samtali við Vísi. „Hann sendi áminningu á okkur um að eina fyrirtækið sem mætti reka Austur væri 101 Austurstræti. Fyrir okkur voru það engar nýjar fréttir enda er það félagið sem að sér um reksturinn.“

„Það er ekkert ólöglegt í því að kaupa verktakaþjónustu af greiðsluleið. Þetta engu að síður fór ekki þannig til sýslumannsins. Kamran sendi inn að það væri eitthvað ólöglegt í gangi og annað fyrirtæki í rekstri þarna inni og býr til fjaðrafok.“

Í framhaldi af því segist Ásgeir hafa fundað með sýslumanni og að sýslumaður hafi tekið við gögnum frá honum.

„Hann er enn að skoða þau gögn og hefur ekki úrskurðað eitt né neitt. Það að rekstur Austur sé ólöglegur og það sé einhver sigur fyrir Kamran, er eins langt frá sannleikanum og hægt er,“ segir Ásgeir.

Hann segir að Austur sé og verði áfram opinn eins og ekkert hafi í skorist.