Jón Steinar vill Egil Helgason af dagskrá RÚV

Jón Steinar Gunnlaugsson, fyrrverandi hæstaréttardómari, ritar harðskeyttan bloggpistil þar sem hann beinir spjótum sínum að sjónvarpsmanninum Agli Helgasyni. Jón Steinar vill meina að Egill misnoti vald sitt sem helsti umfjallandi bókmennta á Íslandi, þá sem umsjónarmaður bókmenntaþáttarins Kiljan í Ríkissjónvarpinu.

„Enginn þarf að efast um að dr. Egill er hávaðasamur boðberi pólitísks rétttrúnaðar á Íslandi og hefur alltaf sömu höfunda í hávegum í þáttum sínum í ríkisfjölmiðlinum. Þeir höfundar eru flestir steyptir í sama pólitíska mótinu. Það er kominn tími til að loka fyrir trúboð dr. Egils Helgasonar í ríkisútvarpinu. Þó að fyrr hefði verið!“

Jón Steinar leggur út af kvikmyndinni Birdman þar sem við sögu kemur gagnrýnandi Times sem hefur í hótunum við stjórnanda leikverks um að eyðileggja það með ritdómi sínum þó gagnrýnandinn hafi ekki séð verkið. Jón Steinar telur einsýnt að þeir sem völdu Birdman sem bestu myndina við síðustu Óskarsverðlaunaafhendingu þekki dæmi um framferði áhrifamikilla gagnrýnenda á borð við það sem myndin lýsir. „Það gerum við líka á Íslandi,“ segir Jón Steinar. „Dr. Egill er þessi eldri kona hér á landi. Hann er  gagnrýnandinn sem með sjónvarpsþáttum sínum oft ræður því hvort birt listaverk hljóti náð fyrir augum almennings.“

Vísir reyndi að ná tali af Agli Helgasyni, til að spyrja hann um afstöðu hans til pistils Jóns Steinars, en án árangurs. Víst er að Jón Steinar hefur sitthvað til síns máls hvað varðar áhrifavald Egils. Í nýlegri úttekt DV um helsta áhrifafólk á Íslandi í þeim efnum sem snúa að menningarmálum er Egill þar ofarlega á blaði og Jóhann Páll Valdimarsson, forstjóri Forlagsins, hefur sagt að bókabransinn nötri á beinunum – gengi bóka ræðst af því hvort og hvernig tökum Egill tekur þær.

Jón Steinar sendi frá sér bók fyrir síðustu jól, Í krafti sannfæringar, en sú bók var ekki tekin til umfjöllunar af Agli.

Víst er að áhrifamenn í Sjálfstæðisflokknum, en við þann flokk er Jón Steinar jafnan kenndur, hafa Egil ekki í hávegum. Vísir fjallaði nýverið um það þegar Davíð Oddsson, nú ritstjóri Morgunblaðsins, fyrrverandi forsætisráðherra og formaður Sjálfstæðisflokksins, sem hefur beint mjög spjótum sínum að Agli í Staksteinaskrifum, og hæðst að honum. Undir þetta hefur svo Hannes Hólmsteinn Gissurarson prófessor og helsti hugmyndafræðingur Sjálfstæðisflokksins tekið. Þau skrif eru að vísu sett fram nafnlaus en slík skrif eru á ábyrgð ritstjórans.