„Frjáls fjölmiðlun er ekkert vinsæl hjá þeim sem hafa vondan málstað“

„Þegar litið er til baka síðustu mánuði þá hefur hálf súrrealísk atburðarrás átt sér stað,“ segir Jóhann Páll Jóhannsson, blaðamaður, í morgunþættinum á FM957, en hann hefur sagt upp störfum hjá DV og tilkynnti hann yfirmönnum sínum það fyrr í gærmorgun.

Í pistli á Facebook segir Jóhann að hann geti ekki ímyndað sér að vinna þar lengur. Hann segir að múrinn á milli ritstjórnar og eigenda sé að hverfa.

Jóhann segir að ýmislegt bendi til þess að menn séu að kaupa sig inn í DV til að ekki sé verið að tala illa um þá.

„Þegar Björn Leifsson keypti hlut í DV, gaf hann alveg út að það væri bara til þess að losna við Reyni Traustason. Hvers vegna? Jú, á vakt Reynis voru skrifaðar fréttir sem Björn var ekki ánægður með.“

Jóhann segir allskonar persónur úr Framsóknarflokkum komið að starfsemi blaðsins að undanförnu. 

„Frjáls fjölmiðlun er ekkert vinsæl hjá þeim sem hafa vondan málstað að verja. Þessar vendingar eru allar nýbúnar að eiga sér stað og ég er nú bara í hlutastarfi í útlöndum og hef því náð að halda ákveðnari fjarlægð. Lekamálið og umfjöllun um Framsóknarflokkinn olli ákveðnum titringi í hluthafahóp blaðsins.“

Jóhann segir að þessi mál hafi valdið því að menn hafi viljað taka yfir DV.

„Maður er bara með rosalegt óbragð í munni eftir að tilkynnt er um nýja ritstjóra, þau eru fengin tvö yfir af Mogganum og Eggert Skúlason, félagi Björns Inga úr Framsóknarflokknum, gerður að ritstjóra. Þar er gengið framhjá t.d. Inga Frey sem er að mér finnst besti blaðamaður landsins.“

Hann segir þróunina á blaðinu undanfarnar vikur vera alveg stórfurðulega.

Ekki hægt að vinna á þessum miðli

„Það er ekkert hægt að vinna á fjölmiðli þar sem það er látið viðgangast að framkvæmdarstjóri, Steinn Kári Ragnarsson, og hluthafi, Sigurður G. Guðjónsson, séu staðnir að því að láta skjöl innan af ritstjórninni berast til auðmanns út í bæ, Björns Leifssonar.“

Jóhann segir að þeir blaðamenn sem hafi spurt spurningar um eignarhald DV hafi einfaldlega verið látnir fjúka. 

„Þeir munu eflaust segja frá því sjálfir á næstu dögum.“