Nýja stjórnin stefnir á fullveldi

Aksel V. Johannesen, formaður Jafnaðarflokksins í Færeyjum, kynnti í gær nýja landstjórn sína, sem er samsteypustjórn með Þjóðveldi og Framsókn.

Stjórnarflokkarnir þrír hafa allir haft fullveldi Færeyja á stefnuskrá sinni og hyggjast nú gera breytingar á stjórnskipan Færeyja, sem eigi að tryggja Færeyjum fullveldi. Þetta á að bera undir atkvæði í Færeyjum ekki síðar en á árinu 2017.

Um fyrirhugaðar breytingar segir í stjórnarsáttmála nýju stjórnarinnar:

„Ný stjórnskipan á að staðfesta að Færeyingar fara með völdin í Færeyjum. Lögin eiga að staðfesta og skilgreina sjálfsákvörðunarrétt Færeyinga, þar með að allur réttur til þess að ákvarða þjóðréttarstöðu Færeyja til framtíðar liggur hjá Færeyingum.”

Jafnaðarflokkurinn sigraði í kosningum til færeyska lögþingsins, sem haldnar voru 1. september, og hlaut fjórðung atkvæða og 8 þingmenn, en Þjóðveldi hlaut fimmtung atkvæða og 7 þingmenn. Þriðji stjórnarflokkurinn er svo Framsókn, sem hlaut tvo þingmenn í kosningunum.

Saman hafa stjórnarflokkarnir þrír því 17 af 33 þingmönnum á færeyska lögþinginu.

Aksel V. Johannessen tekur við af hægri manninum Kaj Leo Johannessen, sem hefur verið lögmaður í tvö kjörtímabil samfleytt.

Varalögmaður nýju stjórnarinnar er Høgni Hoydal, sem er formaður Þjóðveldisflokksins.