Mótmælin í beinni: Nokkur hundruð manns mætt á Austurvöll

Mótmæli eru hafin á Austurvelli að nýju vegna aðgerða ríkisstjórnarinnar í Evrópusambandsmálum. Lögregla telur að um fjögur hundruð manns séu saman komin að þessu sinni, en á samskonar mótmælum í gær skipti fjöldinn þúsundum.

Hægt er að fylgjast með samkomunni í beinni með vefmyndavél Mílu á Austurvelli. Lögregla hefur sett upp vegartálma við þinghúsið vegna mótmælanna, sem hófust klukkan 17.00.

Mikill hiti er í þingmönnum og hefur ekkert annað komist á dagskrá þingsins síðan fundur hófst klukkan 15 en umræða um ákvörðun ríkisstjórnarinnar varðandi ESB. Sú umræða stendur enn yfir og er hægt að fylgjast með henni í beinni útsendingu á Vísi.