Mótmælin á Austurvelli: „Það er eins og við séum lent í tröllahöndum“

„Auðvitað greinir menn á um málefni og leiðir, en lýðræðið byggir á því að menn segja satt og rétt frá því hvað þeir standa fyrir svo kjósendur geti gert upp á milli þeirra á þeim forsendum.“ Þetta sagði Guðrún Pétursdóttir, lífeðlisfræðingur, en hún var ein þeirra sem ávarpaði mótmælendur á Austurvelli í dag. Guðrún er barnabarn Ólafs Thors og minntist hans og þætti hans í sjálfstæðisbaráttu Íslendinga  í ræðu sinni.

Mótmælin í dag voru eins og kunnugt er haldin í kjölfar fregna þess efnis að Gunnar Bragi Sveinsson hefði án samþykktar þingsins afturkallað umsókn Íslands um aðild að Evrópusambandinu. Áætlað er að um átta þúsund manns hafi mætt á Austurvöll.

„Grundvöllur lýðræðisins er að menn segi rétt til sín – enginn á að þurfa að kaupa köttinn í sekknum – við eigum að vita hvern við erum að kjósa – við veljum menn af því að þeir eru skásti kosturinn,“ sagði Guðrún á mótmælunum í dag og vísar þar með í loforð ríkisstjórnarflokkanna um að þjóðin fengi að kjósa um afdrif aðildarumsóknarinnar. Guðrún sagði í ræðu sinni nú ríkisstjórnina hafa gengið enn lengra en að svíkja loforð heldur að nú hafi ríkisstjórnin gert „atlögu að þingræðinu í heigulshætti sínum og hræðslu við að leggja mál fyrir þingið.“

Guðrún var afdráttarlaus í ræðu sinni og fjallaði auk trausts almennings á loforð ríkisstjórnarflokkanna um meðferð hennar á orðspori Íslands. „Það er eins og við séum lent í tröllahöndum. Þessir menn fleygja fjöreggi íslensku þjóðarinnar, orðspori hennar og æru,  út og suður eins og ekkert sé – eins og það geri ekkert til þótt þeir glutri því niður og hreinlega týni því.“ Guðrún sagði líta út fyrir að ríkisstjórn landsins héldi að það skipti ekki máli hvernig hún hegðaði sér.

Virðing fyrir stjórnskipun landsins líður fyrir verk ríkisstjórnarinnar að sögn Guðrúnar. „Ef lýðræðið á að virka – og ef þingræðið á að virka,- verður að virða leikreglurnar. Stjórnskipunina. Og ef ríkisstjórnin gleymir í hverju stjórnskipun okkar er fólgin, þá verðum við að minna hana á. Til þess erum við hér – enn eina ferðina í tíð þessarar ríkisstjórnar: til þess - að gefnu tilefni - að standa vörð um fagleg vinnubrögð.  Að standa vörð um lýðræði gegn gerræði.“