Systir Hreiðars Más um Angelo: „Einstaklega hlýr og góður drengur“

Angelo Uijleman, Hollendingur sem nú sætir farbanni vegna aðildar að umfangsmiklu fíkniefnasmygli, borðaði heima hjá Þórdísi Sigurðardóttur, systur Hreiðars Más Sigurðssonar, fyrrverandi forstjóra Kaupþings, á jóladag.

Þetta kemur fram í færslu sem Þórdís hefur sett á Facebook-síðu sína en þeir Angelo og Hreiðar kynntust á Kvíabryggju þar sem Angelo sat í gæsluvarðhaldi og Hreiðar afplánar dóm vegna Al Thani-málsins:

„Jólin voru hefðbundin en líka með nýju sniði. Á jóladag fengum við Angelo í heimsókn. Hann er frá Hollandi og bíður að vita um sín örlög. Angelo er einstaklega hlýr og góður drengur, hann er jákvæður og bjartsýnn. Daniell var einnig hjá okkur en hún býr í New York og er einn af fyrstu starfsmönnum hjá Tumblr. Frábær stelpa sem elskar Ísland og hefur komið hingað 6 sinnum. Já elskar Ísland!“

Segir hræðilegt að upplifa það að heil þjóð fari gegn ákveðnum hópi fólks

Þórdís segist síðan sjálf aldrei hafa verið eins fjarri því og nú að elska Ísland en hún segir ástæðuna einfalda; hún sé yfirbuguð vegna þess haturs og þeirrar ómennsku sem hún segir þjóðina hafa sýnt fjölskyldu hennar:

„Það er hræðilegt að upplifa það að heil þjóð fari gegn ákveðnum hópi fólks og enn hræðilegra þegar hið svokallaða réttarkerfi fylgir fast á hælana. Það að ætla að kenna nokkrum mönnum um hrunið er jafn fjandsamlegt og heimskulegt og ætla að kenna hjúkrunarfræðingi um dauða sjúklings.

Bróðir minn situr í fangelsi af því að þjóðin hefur úthýst honum. Meðferðin og framkoman er Íslandi til skammar því aftur og aftur hafa grundvallarreglur réttarfarsins verið brotnar. Allir hafa horft í gegnum fingur sér með það - þetta er of stórt til að klikka á einhverjum lagalegum atriðum. Þjóðin og embættismenn hennar telja sér trú um að þetta sé gert til að fullnægja réttlætinu - sefa reiði þjóðarinnar. Það hafi verið óeðlilegt hvernig og hvað var í gangi á árunum í uppganginum. Það beri að refsa!

„Hver er glæpamaðurinn?“

Ekki í einu einasta máli er bróðir minn sakaður um að hafa ætlað að hagnast á gjörðum sínum persónulega. Nei, en samt skal hann sitja inni og það eru engir smá dómar takk fyrir. Í fyrstu var logið upp á að hann hefði stolið öllum verðmætum úr bankanum en hvað hefur komið í ljós - íslenska ríkið er að verða skuldlaust og það sem meira er það á að byggja nýtt sjúkrahús fyrir peninga og eignir sem voru í bankanum - ég spyr hver er glæpamaðurinn? Hver stelur hverju frá hverjum?“

Að lokum segist Þórdís eiga þá ósk heitasta að illska og hatur hætti á nýju ári að og réttarkerfið og þeir sem beri ábyrgð á því átti sig á óréttlætinu og skömminni sem hún segir hafa viðgengist þar.

„Ég á þá ósk að þjóðin snúi frá heiftri og hatri. Ég á þá ósk að réttlæti einkenni ákvarðanir og gjörðir. Er það of mikið? Ég á þá ósk að ég elski Ísland!“

Facebook-færslu Þórdísar má sjá í heild sinni hér að neðan.

Jólin voru hefðbundin en líka með nýju sniði. Á jóladag fengum við Angelo í heimsókn. Hann er frá Hollandi og býður að...

Posted by Frú Þórdís Sigurðardóttir on Monday, 28 December 2015