Vill vekja fólk til vitundar um fitufordóma í samfélaginu

Vekja þarf fólk til vitundar um þá fitufordóma sem til staðar eru í samfélaginu. Umræðuna verður að auka því slíkir fordómar geta haft alvarlegar, jafnvel skaðlegar, afleiðingar í för með sér. Staðalímyndum verður að útrýma því þær eiga sér ekki stoð í raunveruleikanum.

Þetta segir Tara Margrét Vilhjálmsdóttir félagsráðgjafi. Tara skrifði mastersritgerð um svokallaða fitufælni, samfélagslega greiningu á henni og afleiðingum hennar árið 2012. Þá ritaði hún pistil á Vísi árið 2013, sem vakið hefur mikla athygli, enn þann dag í dag.

„Pistillinn vakti mikla athygli og við sjáum það bara að þessi skilaboð verða ekki úrelt, miðað við hvað hann er lífseigur. Það er þessi staðalímynd sem við þekkjum öll og samfélagið virðist vera flokkað í hólf eftir þeim. Fólk kannski samsvarar sér ekki við þessar staðalímyndir og kannski áttar sig ekki á að þær eru ekki réttar. Þær geta haft svo djúpstæð og persónuleg áhrif á okkur og mótar ekki bara sjálfsmynd hvers og eins heldur líka hvernig samfélagið kemur fram við okkar,“ segir Tara.

Falleg en...

Í pistlinum greinir Tara frá fordómum sem hún hefur mætt. Hún segir frá því þegar hún var stödd í veislu og veislugestur segir henni að hún sé „falleg en.... verði að passa upp á fituprósentuna“.

„Það var svo mikil reiði í mér yfir því sem gerðist þarna. Maður hafði orðið óbeint fyrir útlitsáherslum og fitufordómum en þetta var í fyrsta sinn sem ég varð fyrir þeim beint. Ég hafði verið mjög veik, hafði verið með átröskun og lagði mikla áherslu á útlitið. Þarna var ég þó loksins orðin heilbrigð og leið vel í mínu skinni eftir alla þá baráttu sem ég hafði háð innra með mér. Þetta hefði getað haft verulegar afleiðingar í för með sér ef ég hefði ekki verið á þessum góða stað.“

Ekki eigi að draga fólk í dilka eftir útliti

Tara situr í stjórn í Samtökum um líkamsvirðingu, sem hafa það að markmiði að stuðla að virðingu fyrir fjölbreytileika holdafars og jákvæðri líkamsmynd. Samtökin eru vettvangur þeirra sem vilja breytt samfélagsviðhorf tengt útliti og berast þeim því reglulega sögur frá fólki sem orðið hefur fyrir fordómum eða hafa orðið vitni að þeim.

„Fólk á ekki skilið að vera dregið í dilka eftir útliti. Þess vegna þarf að auka umræðuna. Við erum öll mismunandi og þess vegna ættum við að fagna fjölbreytileikanum í stað þess að flokka fólk í hólf,“ segir hún að lokum.

Pistil Töru má lesa hér.