Vilja fá drenginn sinn heim

„Maður veit eiginlega ekki hvar maður á að byrja að lýsa svona ofboðslega jákvæðum og björtum dreng. Hann hefur alltaf verið svoleiðis, bara frá því að hann var ungbarn. Maður finnur aldrei neinn sem gæti sagt um hann eitt einasta styggðaryrði,“ segir Harpa Bryndís Brynjarsdóttir, móðir Andra Freys Sveinssonar, átján ára pilts sem lét lífið í slysi í skemmtigarðinum Terra Mítica á Benidorm á Spáni síðastliðinn mánudag. Harpa er í viðtali í helgarblaði DV.

Andri Freyr var staddur á Spáni með föður sínum og stjúpbróður, systkinum og vinum. Þau höfðu skellt sér saman í dagsferð í skemmtigarðinn. Andri Freyr féll sem kunnugt er úr rússíbananum úr 15 metra hæð. Hann lést skömmu síðar. Málið er til rannsóknar hjá lögregluyfirvöldum á Spáni.

Móðir Andra Freys, ættingjar og vinir hér heima bíða nú eftir að fá lík hans heim til Íslands. „Við viljum fá drenginn okkar heim,“ segir Harpa.

Andri Freyr bjó hjá móður sinni og systkinum í Stekkjarseli í Breiðholtinu í Reykjavík. Móðir hans segir hann hafa verið afar metnaðarfullan og hafi stefnt langt í tölvunarfræði. Hann hafi alltaf verið vinum sínum og fjölskyldu innan handar þegar tölvumál hafi verið annars vegar.

Harpa segir í viðtalinu rangt að fjölskyldan hafi tekið nokkra ákvörðun varðandi skaðabætur líkt og spænskir fjölmiðlar hafa fjallað um. Segir hún sérstaklega mikið um rangan fréttaflutning í spænskum miðlum. Hið rétta sé að faðir Andra hafi þurft að undirrita skjöl tengd flutningi Andra heim. Annað hafi ekki verið rætt.