Ólafur Kristjánsson hættir með Blika

Óvænt tíðindi bárust í kvöld þegar ljóst varð að Ólafur Helgi Kristjánsson yrði ekki þjálfari Breiðabliks í Pepsi-deild karla í knattspyrnu út komandi leiktíð.

Danski blaðamaðurinn Morten Crone greindi frá þessu fyrst á Twitter fyrr í kvöld. Samkvæmt öruggum heimildum Vísis fer Daninn ágæti með engar fleipur. Ólafur verður kynntur til sögunnar sem nýr þjálfari dansks úrvalsdeildarliðs á morgun.

Ekki er ljóst á þessari stundu hjá hvaða félagi Ólafur mun starfa né nákvæm tímasetning á því hvenær Ólafur yfirgefur Breiðablik. Þá er óljóst hver tekur við liði Breiðabliks nú þegar aðeins þrettán dagar eru í að flautað verði til leiks í Pepsi-deild karla. Guðmundur Benediktsson er aðstoðarþjálfari Breiðabliks. Fyrsti leikur Blika í deildinni er mánudaginn 4. maí gegn FH.

Blikar lögðu Þór að velli 2-1 í Lengjubikarnum fyrr í kvöld og eru leikmenn liðsins á leið í bæinn í rútu þegar þetta er skrifað. Þeir mæta FH í úrslitaleik keppninnar í Garðabæ á fimmtudag.

Nordsjælland þýkir líklegur áfangastaður en það er þó ekki staðfest. Ólafur aðstoðaði danska liðið við leikgreiningu á andstæðingum þess í Meistaradeild Evrópu í vetur.

Ólafur spilaði á sínum tíma með AGF í Árósum, þjálfari svo yngri flokka félagsins áður en hann tók við starfi aðstoðarþjálfara liðsins. Hann sneri svo heim til Íslands sumarið 2004 og tók við liði Fram um mitt tímabil. Liðið féll undir hans stjórn árið eftir.

Fimm umferðir eru eftir af dönsku úrvalsdeildinni. Flautað verður til leiks á nýjan leik í júlí.

Enginn þjálfari unnið fleiri leiki með Blika í efstu deild

Ólafur stýrði Breiðabliksliðinu í sjö og hálft tímabil eða allt frá því að hann tók við liðinu af Bjarna Jóhannssyni á miðju sumri 2006.

Breiðablik vann 67 af 159 deildarleikjum sínum undir stjórn Ólafs, náði í 52 prósent stiga í boði og enginn þjálfari Blika hefur unnið fleiri leiki í efstu deild.

Ólafur gerði Breiðablik að bikarmeisturum 2009 og svo Íslandsmeisturum árið eftir. Það eru einu stóru titlar karlaliðs félagsins.

Den tidligere AGF-spiller Olafur Kristjansson på vej til et interessant træner-job i Superligaen. BT tirsdag. #sldk

— Morten Crone (@Morten_Crone) April 21, 2014