Verður Hrísey að sumarhúsabyggð?

10 sjávarbyggðir eru í bráðum vanda samkvæmt úttekt byggðastofnunar. Óttast er að Hrísey breytist í sumarhúsabyggð leggist fiskvinnsla af á eyjunni. Sjávarútvegsráðherra ætlar að auka aflaheimildir til sjávarbyggða í vanda.

Í minnisblaði sem Byggðastofnun vann fyrir sjávarútvegsráðuneytið er farið yfir stöðu sjávarbyggða á Íslandi. Nokkur umræða hefur verið um byggðarröskun í kjölfar ákvörðunar Vísis hf. sem áformar að hætta starfsemi sinni á Húsavík, Djúpavogi og Þingeyri sem er mikið reiðarslag fyrir tvo síðarnefndu byggðarlögin.

Byggðastofnun skilgreinir 10 sjávarbyggðir í bráðum vanda og taka sex þeirra þátt í verkefninu „efling sjávarbyggða“. Fjórar sjávarbyggðir bætast á listann í ár. Byggðastofnun hafði 1.800 þorskígildistonn til ráðstöfunar á síðasta ári og leggur fram fjórðung hráefnis til vinnslu á móti þremur fjórðu hráefnis frá einkaaðilum.  Ráðherra ætlar að auka aflaheimildir Byggðastofnunar um 1.100 tonn til viðbótar.

„Það sem við höfum séð af verkefninu til þessa þá erum við vongóð um að þetta sé mun betri leið en núverandi byggðakvóti sem hefur verið lengi við lýði. Það háttar þannig til víða á Íslandi að á mörgum stöðum þar sem sjávarútvegur er grunnatvinnugreinin að þá er hún ekki aðeins grunnatvinnugreinin heldur sú eina,“ segir Sigurður Ingi Jóhannsson, sjávarútvegsráðherra.

Sérstakar áhyggjur eru af stöðunni í Hrísey. Hvammur hf., sem er langstærsti vinnuveitandinn í eynni, hefur sagt upp öllu starfsfólki við fiskvinnslu. Leggist vinnslan af er hætta á að Hrísey verði fyrst og fremst sumarhúsabyggð.

„Ef við grípum ekki til einhverra aðgerða þá gætu þetta verið deyjandi byggðir sem geta þá breyst í sumarhúsabyggðir eða jafnvel yfirgefnar byggðir. Það viljum við ekki sjá og viljum tryggja að þessar byggðir eigi lífsgrundvöll. Hrísey er eitt þessara verkefna sem við horfum til.“