Milljón dollara tekjur af The Interview fyrsta daginn

Tekjur af kvikmyndinni The Interview námu einni milljón dollara á jóladag, eða sem nemur 127 milljónum íslenskra króna. Myndin er aðeins sýnd í 331 kvikmyndahúsi í Bandaríkjunum og nema tekjurnar rúmum þrjú þúsund dollurum á hvert kvikmyndahús.

Tekjurnar ná aðeins til kvikmyndahúsa en myndinni hefur verið dreift á netinu gegn gjaldi. Til að mynda hefur verið hægt að leigja myndina í gegnum YouTube, Google Play og Xbox Video. Það er því óljóst hverjar heildartekjurnar voru fyrsta daginn.

Myndin er einhver sú umtalaðasta síðustu vikur og mánuði en talið er að hún hafi verið ástæða stórfellds tölvuinnbrots hjá Sony, sem framleiðir myndina, en bandaríska alríkislögreglan hefur rakið það til Norður-Kóreu. The Interview fjallar um morð á Kim Jong-Un, leiðtoga ríkisins.

Tölvuþrjótarnir sem framkvæmdu innbrotið gerðu kröfu um að myndin yrði ekki sýnd og hótuðu árásum á þau kvikmyndahús sem tækju myndina til sýningar. Í kjölfarið hættu mörg bíó við að sýna myndina og Sony féll frá fyrirhugaðri frumsýningu myndarinnar.

Ákvörðun var svo tekin um að gefa myndina út á netinu og sýna hana í völdum kvikmyndahúsum, þrátt fyrir hótanir tölvuþrjótanna.