Saka Snowden um ofsóknarbrjálæði og öfgaskoðanir

Uppljóstrarinn Edward Snowden og aðrir uppljóstrarar eru sakaðir um ranghugmyndir og öfgaskoðanir í nýrri og ítarlegri fréttaskýringu The New Republic. Þar segir meðal annars að búið sé að gera mun meira úr aðgerðum bandarísku Þjóðaröryggisstofnunarinnar (NSA) en tilefni er til.

Snowden er af mörgum álitinn frelsishetja fyrir að hafa lekið trúnaðarupplýsingum NSA til fjölmiðla á seinasta ári. Margir fjölmiðlar segja Snowden vera pílagrím sem lagði allt í sölurnar til að koma illa fengnum upplýsingum NSA í hendur almennings. Upplýsingar og frekari fyrirgrennslan fjölmiðla í kjölfar lekans hafa leitt í ljós víðtækar persónunjósnir ýmissa vestrænna ríkja á eigin þegnum og þegnum annarra ríkja.

New Republic, sem er vinsæll félagshygginn fjölmiðill, segir málið þó ekki svo einfalt. Í fréttaskýringu New Republic er ýjað að því að Snowden og aðrir uppljóstrarar starfi einfaldlega í þágu eigin pólitískra sjónarmiða, en ekki af fórnfýsi í garð almennings.

Uppljóstrararnir höfðu annarlegar hvatir

Snowden er sagður „ofsóknarbrjálaður frjálshyggjumaður" og með lekanum hafi honum verið efst í huga að „koma höggi á frjálslynt nútímasamfélag," enda fyrirlíti hann það. Þá er vísað til ummæla á spjallsíðu sem eru talin vera eftir Snowden þar sem hann lýsir yfir ánægju sinni í garð hinnar umdeildu annarar greinar bandarísku stjórnarskrárinnar sem er ætlað að tryggja bandarískum ríkisborgurum rétt til að bera vopn. Þá er vísað til ummæla sem sýna Snowden lýsa óbeit sinni á bandarísku velferðarkerfi, þar sem hann segir meðal annars líkt og „gamalt fólk sé gert úr gleri."

Trúverðugleiki Snowden er að auki dreginn í efa með tengslum hans við ýmis fyrirmenni í bandarískum stjórnmálum. New Republic nefnir sem dæmi að Snowden hafi aðhyllst ýmis stefnumál repúblikanans Ron Paul, eins og til að mynda hugmyndir hins síðarnefnda á að koma á gullfót í Bandaríkjunum. Á sama tíma mun Snowden hafa haft mikla óbeit á efnahagsstefnu Barack Obama, núverandi bandaríkjaforseta.

Ekki tilefni til að vantreysta lýðræðiskjörnum ríkisstjórnum

Þá koma einnig fram upplýsingar sem ætlað er að sýna fram á að stjórnendur Wikileaks hafi ekki starfað af heilindum. Til að mynda er sagt frá því hvernig Wikileaks ætluðu einn daginn að ljóstra upp gögnum frá rússneskum yfirvöldum, en þann næsta hafi Rússar farið fremstir í flokki í að verja uppljóstranir Wikileaks. Meðal annarra er Kristinn Hrafnsson, talsmaður Wikileaks nefndur á nafn í því samhengi.

Fréttaskýringin segir fjölmiðla einnig hafa gert meira úr alvarleika njósna NSA en tilefni var til. Að endingu kemur fram að ekki sé tilefni til að vantreysta lýðræðiskjörnum ríkisstjórnum með þeim hætti sem Snowden og aðrir uppljóstrarar gera. Þó að eftirlit sé ekki aðlaðandi hluti af lýðræðissamfélögum sé það þó ekki andstætt þeim, en það séu uppljóstrararnir „ekki færir um að átta sig á."