„Reykjavík var og er hafnarborg“

Þetta er í sextánda sinn sem hátíðin er haldin og er fyrst núna að festa sig í sessi meðal almennings sem er ánægjulegt,“ segir Dagmar Haraldsdóttir, framkvæmdastjóri Hátíðar hafsins sem fer fram við Reykjavíkurhöfn um helgina.

Dagskrá hátíðarinnar er þéttskipuð skemmtiatriðum og uppákomum þar sem hafið og sjómennskan eru í lykilhlutverki.

„Höfnin og hafnarsvæðið í Reykjavík er að verða sýnilegra og sýnilegra með hverju árinu. Við megum ekki gleyma því að Reykjavík væri ekki sú borg sem hún er í dag án hafnarinnar, hún er og var hafnarborg.“

Meðal þess sem er á boðstólum um helgina er sjóræningjasigling, reiptog og lukkuhjól. Skoppa og Skrítla og Latibær skemmta börnunum, Reykjavíkurdætur eru meðal þeirra fjölmörgu sem taka lagið á sviðinu og hægt verður að bragða á alls kyns mat.

„Ég hef ekki tölu á hvað þetta eru margir viðburðir en það verður eitthvað fyrir alla. Til dæmis erum við búin að safna saman nokkrum keppendum í Söngvakeppni framhaldsskólanna sem eru búin að æfa gömlu sjómannslögin og það er æðislega flott hjá þeim. Það verður á stóra sviðinu á morgun kl. 14. Markmið okkar er að fjölskyldan geti komið hingað og gert sér glaðan dag án þess að það kosti eitthvað. Auðvitað er eitthvað til sölu en mestmegnis er um ókeypis skemmtun að ræða.“

Dagmar er búin að rýna í veðurspá dagsins og segir hana lofa góðu.

„Norska veðursíðan segir að það eigi að vera sól og léttskýjað milli 12 og 16, verðum við ekki bara að treysta því? Annars kunnum við Íslendingar að klæða okkur eftir veðri. Er ekki upplagt að fólk komi hingað um leið og það er búið að fara á kjörstað?“

Hægt er að nálgast nánari dagskrá Hátíðar hafsins á vefsíðu hátíðarinnar.