Verðum að taka ábyrgð á andlegri heilsu

Með mánaðar fyrirvara ákvað ég bara að skella mér til ótrúlegrar eyju í Taílandi sem heitir Koh Phangan. Þar fann ég mér frábæran jógakennara, naut lífsins í fimm vikur og kynntist dásamlegum stað,“ segir Þóra Hlín Friðriksdóttir, hjúkrunarfræðingur og jógakennari.

Oreon-jógasetrið er umhverfi fyrir fólk sem þráir að hlúa að sjálfu sér en boðið var upp á ýmsar heildrænar heilsumeðferðir, detox, föstur og fleira.

„Fólk verður að taka ábyrgð á andlegri og líkamlegri heilsu sinni. Því langar mig að vekja athygli á þessum stað þar sem lífið var einfalt og fólkið var svo ótrúlega hamingjusamt. Maður býr að þessari reynslu alla ævi,“ segir Þóra Hlín.

Árið 2012 fór hún í sína fyrstu jógaferð til Indlands, sem hún segir vera miðpunkt jógaiðkunar í heiminum. Hún uppgötvaði mikilvægi þess að hafa kjarkinn til að ferðast og upplifa framandi staði á eigin forsendum.

Þóra Hlín æfði jóga tvisvar á dag í heilan mánuð og segist hafa tekið sína jógaiðkun á hærra plan eftir upplifunina.

„Þessi ferð fór fram úr mínum björtustu vonum því ég fylgdist með fólki sem kom þangað útúrstressað en yfirgaf staðinn eftir ellefu daga, geislandi og endurnært á líkama og sál. Mér leið stórkostlega þarna og hjartað er núna á réttum stað.“