Ósátt við skort á upplýsingum

Eldur kviknaði í Rimaskóla í Grafarvogi í gær. Fjórar færanlegar kennslustofur brunnu til kaldra kola, en þær höfðu allar verið yfirgefnar fyrir löngu og seldar fyrir meira en ári síðan. Enginn slasaðist en tjónið af völdum brunans nemur á bilinu 40 til 50 milljónum króna að sögn Kristjáns Sveinbjörnssonar, formanns Svifflugfélags Íslands, en kennslustofurnar voru í eigu félagsins. Talið er að kveikt hafi verið í stofunum og hefur lögreglunni á höfuðborgarsvæðinu borist nokkrar ábendingar um hver gæti hafa verið að verki.

Ragnheiður Lára Guðrúnardóttir, móðir nemanda í fyrsta bekk skólans, gagnrýnir skort á upplýsingum í kjölfar brunans. Henni finnst skólinn ekki hafa staðið sig nógu vel í að láta foreldra vita hvað gekk á.

„Mér finnst mjög óþægilegt hvað við fengum lítið að vita,“ segir Ragnheiður en mikil óvissa ríkti meðal foreldra nemenda skólans. „Ég sat bara og fylgdist með hverri fréttinni á fætur annarri á vefmiðlunum án þess að skólinn hefði samband. Ég er óánægð með upplýsingaleysið,“ segir hún.

Önnur móðir sem Fréttablaðið hafði samband við sagðist ekki hafa heyrt neitt frá skólayfirvöldum. Þess í stað hafi dóttir hennar hringt og beðið hana um að sækja sig og að mikið óðagot hefði ríkt meðal barnanna.

Skólastjóri Rimaskóla, Helgi Árnason, sendi nokkru síðar tölvupóst til foreldra barnanna þar sem hann greindi frá því að öllum nemendum hefði verið safnað saman í íþróttahúsið og væru ómeiddir. Þá gætu foreldrarnir sótt börnin í samráði við kennara, en annars héldi kennsla óbreytt áfram.

Að sögn Jóns Viðars Matthíassonar slökkviliðsstjóra voru ekki brunavarnir í þessu tiltekna húsnæði. Ástæðan sé sú að skúrarnir hafi verið í niðurníðslu heillengi. Byrgt hafi verið fyrir gluggana og skúrarnir yfirgefnir í þrjú ár.

Þeir voru í eigu Svifflugfélags Íslands. Félagið hafði reynt í heilt ár að flytja skúrana til síns athafnasvæðis. Skrifræðisleg vandkvæði hafi þó gert þeim erfitt fyrir hvað flutning varðar.

„Við keyptum skúrana í júní og gerðum þá strax ráðstafanir til að flytja þá á okkar athafnasvæði. Til þess þarf lögreglufylgd þar sem skúrarnir eru of breiðir fyrir hefðbundinn flutning,“ segir Hólmgeir Guðmundsson, gjaldkeri félagsins „Lögreglan vildi ekki veita slíka fylgd fyrr en hún hefði fengið leyfi hjá Vegagerðinni og Samgöngustofu. Samgöngustofa krafðist þess að fá stöðuleyfi frá Kópavogsbæ. Vegna ókunnra ástæðna vildi bærinn ekki gefa þetta stöðuleyfi.“