Komnir með ábendingar um hvernig eldurinn kviknaði

Lögreglunni á höfuðborgarsvæðinu hafa borist nokkrar ábendingar um hver gæti hafa verið að verki þegar eldur kviknaði í Rimaskóla í Grafarvogi í dag. Mikill eldur kom upp þar rétt fyrir klukkan 12  í mannlausu húsnæði við skólann.

„Við erum með ábendingar sem við erum að vinna úr og teljum nokkuð líklegar, segir Árni Þór Sigmundsson varðstjóri hjá lögreglunni á höfuðborgarsvæðinu.

Fjöldi barna fylgdist með

Hann segir að lögreglan eigi eftir að hafa samband við þann sem helst er grunaður vegna málsins. Málið muni að öllum líkindum skýrast síðar í dag. Niðurstöður muni þá liggja fyrir í fyrramálið.

Slökkviliði höfuðborgarsvæðisins gekk vel að ná tökum á eldinum en mikill reykur barst í átt að skólanum og inn í skólastofur.

Nemendur í skólanum voru úti í frímínútum þegar eldurinn kviknaði og lagði fjöldi barna leið sína í átt að skúrnum til að fylgjast með því sem fyrir augu bar. Kennarar náðu þó fljótlega að skerast í leikinn og voru allir nemendur fluttir í íþróttasal skólans.