Eldgígurinn eyðilagði iPodinn

„Það var skrítið og skemmtilegt að leika í þessari mynd en ég var ekkert hrædd að fara þarna niður,“ segir hin tólf ára gamla Hera Lind Birgisdóttir sem leikur annað aðalhlutverkanna, ásamt Guðmundi Inga Þorvaldssyni, í nýrri íslenskri stuttmynd sem ber nafnið Rof.

Myndin er tekin upp ofan í Þríhnúkagíg eða um 170 metra undir yfirborði jarðar. Gíghellirinn þar nefnist Þríhnúkahellir og er hann talinn eitt stærsta og merkasta náttúrufyrirbæri sinnar tegundar á jörðinni.

„Það eina sem var svekkjandi var að iPodinn minn virkaði ekki í gígnum. Ég veit þó samt ekki hvort eldfjallið er orsakavaldur, það gæti hafa verið kuldinn þarna niðri sem hafði þessi áhrif. Hann hefur allavega ekki virkað síðan,“ segir Hera Lind. Talsverðan kulda og raka er að finna þegar komið svo langt undir yfirborð jarðar.

Þetta var þó ekki frumraun Heru Lindar því hún hefur leikið í nokkrum stuttmyndum og þáttum. „Ég hef leikið í nokkrum stuttmyndum sem mamma hefur verið að gera,“ segir Hera Lind.

Hera Lind er alvön hellum því hún bjó ásamt móður sinni, Maríu Kjartansdóttur, í skógi og hellum á Spáni. „Við bjuggum þarna í tengslum við verkefni sem ég var að vinna þarna í fjallahéruðum Andaluciu og í skóginum Beneficio sem er skammt frá fjallaþorpinu Orgiva,“ segir listakonan María Kjartansdóttir, móðir Heru Lindar.

Listahópurinn Vinnslan vann myndina Rof og framleiddi en María og Vala Ómarsdóttir leikstýra myndinni. Birgir Hilmarsson sér um tónlistina í myndinni.

Myndin tekur okkur á ferðalag og sýnir hve lengra og lengra við færumst frá rótum okkar. Rof er byggð upp sem ljóðrænt samspil myndar og hljóðverks, en myndin er fyrsta listræna kvikmyndin í heiminum sem tekin hefur verið svo djúpt ofan í lóðréttum eldgíg.

Myndin verður forsýnd næstkomandi laugardag í Tjarnabíói og er hluti af dagskrá opnunarhátíðar Tjarnarbíós. Þess má til gamans geta að Vinnslan sér um listræna stjórnun í Tjarnarbíói á opnunarhátíðinni.

Hér er hægt að kynna sér myndina frekar og hér er hægt að kynna sér listahópinn Vinnsluna frekar.