Spila fótbolta inní plastkúlu

„Félagi minn sýndi mér myndband af þessu. Okkur fannst þetta svo sniðugt að við fórum á fullt að skoða hvernig þessir boltar væru og út á hvað þetta gengi. Við skoðuðum líka hverjar öryggiskröfurnar væru, hvar væri best að kaupa boltana og annað í þeim dúr. Við pöntuðum prufubolta til landsins til að athuga hvort þetta væri í lagi og öruggt. Okkur fannst þetta svo fáránlega skemmtilegt að við ákváðum að kýla á þetta,“ segir Kristján Valgeir Þórarinsson. Hann stofnaði fyrirtæki fyrir stuttu með félaga sínum Eyjólfi Berg Axelssyni í kringum skemmtun sem heitir bubblebolti. Í bubblebolta klæðast leikmenn plastkúlu og spila fótbolta.

„Leikmenn eru bundnir inn í boltana í öryggisbelti og því óhætt að gera allan fjandann í þessu. Auk þess að spila fótbolta er hægt að fara í alls kyns leiki í boltunum,“ segir Kristján og ítrekar að fyllsta öryggis sé gætt þegar íþróttin er spiluð.

Á ensku kallast þetta grínsport Zorb Football en ekki eru stífar reglur í íþróttinni eins og í hefðbundnum fótbolta.

„Það eru engar reglur um tæklingar eða slíkt enda er ekki hægt að tækla hinn andstæðinginn klæddur í þessar kúlur. Ég myndi segja að þetta væri fótbolti með „súmóglímueðli“. Ég held að þetta sport komi upprunalega frá Bretlandi þar sem upphafsmaður íþróttarinnar var búinn að ganga með þessa hugmynd í maganum í langan tíma. Á síðustu tveimur til þremur árum hefur þetta breiðst út til flestra landa. Þetta er mjög skemmtilegt í steggjanir og hópeflisleiki til dæmis,“ bætir Kristján við. Hann viðurkennir að það sé erfitt að halda andlitinu þegar íþróttin er spiluð.

„Það er mjög erfitt að hlæja ekki enda er þetta skemmtileg íþrótt,“ segir Kristján. Hann og Eyjólfur hófu starfsemi á sunnudag þegar þeir buðu vinum sínum í prufubolta.

„Þá fór þetta á fullt. Þetta breiddist út hraðar en við bjuggumst við og við erum byrjaðir að taka niður bókanir. Markhópurinn er fyrst og fremst þeir sem vilja skemmta sér. Þetta er meira gaman en keppni.“