Söngkona lifir drauminn í borg englanna

„Mig langaði að fara út til þess að lifa drauminn,“ segir hin 25 ára gamla söngkona Steinunn Ósk Axelsdóttir, sem flutti árið 2011 til Los Angeles til þess að elta drauminn sinn, sem er að verða atvinnutónlistarkona.

Hún hefur klárað gráðu sem kallast Associate of Arts degree in Vocal Performance við tónlistarskólann Musician Institute (M.I.) í Los Angeles. Þar kynntist hún hljómsveitarfélögum sínum. „Það voru nemendur í skólanum sem voru að leita að söngkonu með sérstaka rödd og ég varð fyrir valinu,“ útskýrir Steinunn Ósk.

Hljómsveitin, sem nefnist In the Key of Earth, hefur nú gefið út sína fyrstu plötu sem er samnefnd hljómsveitinni. „Við tókum plötuna upp sjálf og gáfum hana líka út sjálf.“ Ásamt Steinunni Ósk eru þau Jazzlyn Rose hljómborðsleikari og David Kirsh gítarleikari í hljómsveitinni.

Var ekki mikið mál að gefa sjálf út plötu í Bandaríkjunum? „Jú, þetta var heilmikið ferli og mikil vinna, en algjörlega þess virði.“ Á Íslandi hafði hún lært söng í eitt ár við Söngskóla Reykjavíkur og var hún í Tónlistarskóla FÍH í þrjú ár.

Hún segir lífið í Los Angeles vera frábært og að hún sé ekki á leiðinni heim til Íslands í bráð. „Hér er alltaf frábært veður og það er alltaf eitthvað að gerast í Hollywood,“ segir Steinunn Ósk, en hún býr við Hollywood Boulevard. „Það tekur mig bara tvær mínútur að rölta til dæmis að Kodak Theater, þar sem Óskarinn fer fram í byrjun mars.“

Spurð út í fræga fólkið, segist Steinunn Ósk hafa hitt allnokkra þekkta einstaklinga í Hollywood. Hún hitti til að mynda tvo leikara á tónleikum með hljómsveitinni Steel Panther í Hollywood, þá Ron Jeremy og Dane Cook. „Það var bara fyndið að hitta Ron Jeremy, en hann var nett subbulegur náungi. Hins vegar var Dane Cook töluvert fágaðri og snyrtilegri. Ég þekki söngvara Steel Panther, Michael Starr, ágætlega og fékk að kíkja baksviðs eftir tónleikana og þar hitti ég leikarana,“ útskýrir Steinunn Ósk.

Hún starfar einnig sem aðstoðarkennari í M.I. „Ég vinn við að aðstoða nemendur sem eiga í erfiðleikum með námið. Einnig starfa ég við að spila á tónleikum á hverjum degi með hinum aðstoðarkennurunum, til þess að þjálfa nemendur skólans sem eru að æfa sig í hljóðblöndun á tónleikum. Þetta er rosalega skemmtileg vinna,“ útskýrir Steinunn Ósk.