Stjarna í alþjóðlegri Nokia-auglýsingu

„Þessi myndbönd eru gerð til að sjá hvernig Nokia Lumia-símarnir virka. Allt myndbandið er tekið uppá síma og það hljómaði ekki vel í mín eyru fyrst. Síðan sá ég afraksturinn og hann lítur betur út en ef ég hefði tekið þetta upp á stóru upptökuvélinni minni,“ segir BMX-kappinn Anton Örn Arnarson. Menn hjá símafyrirtækinu Nokia höfðu samband við hann og báðu hann um að taka þátt í verkefni sem kallast Nokia PUREVIEWS.

„Ég er að reyna að koma mér á framfæri í BMX-heiminum og bý til myndbönd sem ég sendi svo út í heim á síður sem birta þannig myndbönd. Tveir gæjar sem vinna í Frakklandi og eru með BMX-síðu þar vissu af mér og báðu mig um að hjóla í myndbandi fyrir Nokia,“ segir Anton. Babb kom í bátinn deginum áður en Frakkarnir áttu flug hingað til lands.

„Ég datt á fjallahjóli og viðbeinsbraut mig. Það var svolítið sjokk því ég var spenntur fyrir að fá þá hingað. Ég þurfti að fara í aðgerð og þeir komu þremur mánuðum seinna, í september á síðasta ári. Þeir borguðu allt fyrir mig og greiddu mér mjög vel.“

Myndbandið var frumsýnt fyrir helgi en það er hluti af röð myndbanda til að kynna Nokia Lumia-síma.

„Topparnir hjá skrifstofunni í Nokia segja að þetta sé uppáhaldsmyndbandið sitt.“

Anton er með styktaraðila í Svíþjóð, Bretlandi og á Íslandi. Hann fer regulega út að keppa, nú síðast til Flórída og Svíþjóðar. Hann byrjaði að hjóla á BMX sextán ára gamall og er 22ja ára í dag.

„Ég er búinn að rotast, brjóta tennur og flest bein. Þetta er svolítið hættulegt. En mamma er stolt af mér. Þetta er skárra en að hanga úti í horni að reykja. Þetta er mjög heilbrigður lífsstíll.“