Sagði Robbie Willams að fara 20 mínútur í ljós

Marta Jonsson býr í London og er eigandi skóverslunar í eigin nafni. Lífið spurði hana spjörunum úr.  

Nafn, aldur og starf?

Marta Jonsson, 44, eigandi Marta Jonsson.

Hvern faðmaðir þú síðast?

Mömmu.

En kysstir? 

Manninn minn úti í bíl áður en við löbbuðum inn í vinnu.

Hver kom þér síðast á óvart og hvernig?

Það er ég sem kem öllum á óvart, ég sjálf er ekkert mikið fyrir það.

Hvaða galla í eigin fari ertu búin að umbera allt of lengi?

Ég get ekki hætt að skilja skóna mína eftir út um allt hús, Þeir eiga að fara í skóskápinn. Fæ smá kvartanir frá heimilisfólkinu, en þetta er nú bara svona þegar maður á svona mikið af skóm.

Ertu hörundsár?

Það fer alveg eftir því hver á í hlut, en ég myndi nú samt segja að ég sé ekki mjög hörundsár og svakalega fljót að jafna mig.

Dansarðu þegar enginn sér til? Ó, já, dilla mér og dilla þegar enginn sér til.

Hvenær gerðirðu þig síðast að fífli og hvernig?

Ég elska að gera grín að sjálfri mér en finnst ljótt að gera grín að öðrum.

Hringirðu stundum í vælubílinn? Ertu að tala um sjúkrabíl?

Tekurðu strætó?

Búin að búa í 20 ár í London og tók ekki strætó fyrr en fyrir þremur árum, og fíla það alveg í tætlur. Það þarf ekki bílastæði fyrir strætóinn.

Hvað eyðirðu miklum tíma á Facebook á dag?

Fer eftir því hvaða dagur er, en líklega 10 mín. að meðaltali, Já, já, mín voða snögg.

Ferðu hjá þér þegar þú hittir fræga eða heilsarðu þeim?

Nei, ég gef þeim frekar góð ráð. Ég sagði Robbie Willams einu sinni að fara í 20 mínútur í ljósabekk þar sem perurnar væru ekki nógu góðar. Hann þakkaði mér mikið vel fyrir.

Lumarðu á einhverju sem fáir vinir þínir vita um þig?

Það er nú svo margt og misjafnt eftir vinum, sumum vinum segir þú meira en öðrum og líka rosalega misjafnt um hvað þú talar við hvern. Mamma er samt besta vinkona mín og ég segi henni allt.

Hvað ætlarðu alls ekki að gera í vikunni?

Fá mér súkkulaði. Það er febrúar og það gleymdist að detoxa í janúar.