Helga hannar litríka sundboli

Helga Lilja hannar föt undir merkjum Helicopter sem er hennar eigið framleiðslufyrirtæki. Fyrir tveimur árum sá hún verk eftir myndlistarkonuna Hörpu Björnsdóttur sem hafði ákveðið að mála mynd á dag í Meistaramánuði og sýna almenningi. Hún varð heilluð af myndunum og sá fyrir sér að þær gætu skapað flott munstur á fötum.

„Harpa er vinkona mín og eftir að ég sá myndirnar spurði ég hana strax hvort hún væri til í að vinna með mér,“ segir Helga. „Fyrsta flíkin sem varð til úr þessu samstarfi er sundbolurinn sem ég sýndi á Facebook í vikunni en munstur eftir hana verða á fleiri flíkum sem ég kynni á næstunni.“

Helga segist alltaf hafa gert sín munstur sjálf en stíll Hörpu sé skemmtilegur og hafi kveikt áhuga hennar á samstarfi. Sjálf er Helga að hefja fjórða starfsár sitt með Helicopter-vörurnar. Hún rekur verslunina Kiosk ásamt fleiri hönnuðum og segist hanna vörur á konur úr þægilegum efnum og einföldum sniðum þar sem litagleðin ræður ríkjum.“

„Fatahönnunarbransinn er auðvitað enginn dans á rósum. Maður verður að taka áhættu en það er gaman að sjá hugmyndir verða að veruleika,“ segir Helga. Fötin eftir hana og Hörpu verða til sölu í Kiosk í sumar auk þess sem Helga selur vörur í búðum í Bandaríkjunum og Bretlandi.