10 spurningar: Langaði svo að vera venjuleg

Lífið kynnist hinni hliðinni á Þórunni Grétu Sigurðardóttur með 10 spurningum.

1. Hver er þín fyrsta minning? Mér finnst ég muna eftir mér að horfast í augu við ísbjörn í Sædýrasafninu í Hafnarfirði og hef þá ekki verið gömul. Sumir halda því reyndar fram að safninu hafi lokað áður en ég fæddist, en ég neita að trúa því að þessi mynd sé draumur, því hún er mjög skýr!

2. Við hvað ertu hrædd? Slöngur og flugvélar.

3. Hver er þinn nánasti vinur? Vistkerfið og jörðin sem hýsir alla vini mína.

4. Hvernig slakar þú á? Með teppi og bók í sófa þegar ég er ein. Spil og spjall með vinum.

5. Í hverju ertu best? Ég er ein af þessum sem er nokkuð fær í mörgu en ekki best í neinu. Heyrði einhvern tíma sagt að sérhæfing væri bara fyrir skordýr og greip það mottó á lofti mér til málsbóta.

6. Hvað finnst þér mikilvægast í fari annars fólks? Að það sé skemmtilega gallað og hafi húmor fyrir því.

 7. Lýstu síðasta skiptinu þar sem þú manst eftir að hafa verið ótrúlega hamingjusöm. Ég var með útskriftartónleika úr mastersnáminu mínu 16. janúar sl. og það var mikil hamingja að hneigja sig að þeim loknum.

8. Hverju myndirðu vilja breyta í heiminum? Ég held að öll vandamál heimsins orsakist af græðgi, ekki síst valdagræðgi. Ég myndi vilja breyta henni í gjafmildi. Það er til nóg handa öllum í heiminum í dag, það vantar bara gjafmildi til að skipta gæðunum á milli.

9. Hvers gætir þú ekki lifað án? Fólks. Mér þætti vont að vakna ein í heiminum eins og Palli. Þótt fólk sé oft með vesen, þá myndi ég nú samt ekki vilja lifa í mannlausum heimi.

10. Eitthvað um þig sem kemur á óvart. Ég ákvað einu sinni að hætta í tónlist og las lögfræði í HÍ. Ég þraukaði í tvö og hálft ár af því mig langaði svo mikið að verða venjuleg.

KÍTÓN, félag kvenna í tónlist blæs til tónlistarveislu þegar rjóminn af íslenskum tónlistarkonum stígur á svið í Eldborg 2. mars. Þórunn er í þeim hópi. Miðasala fer fram á Harpa.is og Midi.is