Þakklát hjón gáfu Landspítalanum milljón

Hjón sem ekki vilja láta nafna sinna getið gáfu eina milljón króna til þjarkasöfnunarinnar á Landspítala.

„Að baki liggur mikið þakklæti fyrir góða þjónustu þvagfæraskurðdeildarinnar við eiginmanninn sem færði lífi hans nýtt gildi,“ segir á vef Landspítalans. Þjarki er vélmenni sem nota við þvagfæraskurðlækningar.

„Segja má að þjarkinn sé framlenging á fingrum skurðlæknisins þannig að allar hreyfingar hans verði nákvæmari,“ segir á vef spítalans. Sýn skurðlæknisins í þjarkanum verði auk þess framúrskarandi góð.

Aðgerðarþjarki (róbót) er í notkun á helstu sjúkrahúsum í nágrannalöndunum en hann nýtist til margvíslegra skurðaðgerða, sérstaklega við þvagfæraskurðlækningar sem og aðgerðir á grindarholslíffærum kvenna.  Inngripið verður minna en með hefðbundinni aðferð, hægt að hlífa betur nærliggjandi líffærum og viðkvæmri starfsemi og stuðla þannig að því að batinn verði skjótari.

Hjónin hafa sagt að þó að þjarkinn eigi sennilega ekki eftir að koma þeim sjálfum að gagni þá gleðji þau og ylji mikið sú tilhugsun að slík tækni eigi í framtíðinni eftir að færa öðrum líf eða bæta það, þeim og þeirra nánustu til gleði og heilla.

Söfnun stendur yfir til að fjármagna kaup á aðgerðarþjarka en nánari upplýsingar má finna á vef Landspítalans.