Nóróveira á undanhaldi

Nóróveirusýking sem greindist á hjúkrunardeild á Heilbrigðisstofnun Austurlands á Egilsstöðum er nú á undanhaldi. Deildin var opnuð að nýju síðastliðinn föstudag. Austurfrétt greindi frá.

Deildin var einangruð föstudaginn 2. maí eftir að sýni úr vistmanni staðfesti tilfellið.  Átta manns á deildinni fundu fyrir einkennum og álíka margir starfsmenn.

„Það eru ákveðnar verklagsreglur sem við fylgjum. Ef þrír til fjórir finna fyrir einkennum þá grípum við til þeirra,“ segir Nína Hrönn Gunnarsdóttir, framkvæmdastjóri hjúkrunar á HSA í samtali við Vísi.

„Við viljum bara koma því á framfæri að starfsfólkið stóð sig gríðarlega vel. Aðstæður eru mjög erfiðar. Við búum við erfiðan og þröngan húsakost sem gerir okkur ansi erfitt fyrir,“ segir Nína.

Einkenni nóróveirusýkinga eru vanalega ógleði, uppköst, niðurgangur og stundum magakrampar. Sumir fá að auki væga hitahækkun, hroll, höfuðverk, vöðvaverki og þreytu. Veikindin byrja skyndilega og vara stutt, yfirleitt 1?2 daga. Almennt fá börn meiri uppköst en fullorðnir en flestir sem sýkjast fá bæði uppköst og niðurgang.

Sýkingin er oftast nær ekki alvarlegur sjúkdómur þó fólk sé mjög veikt á meðan á henni stendur og kastar upp mörgum sinnum á dag. Flestum batnar að fullu eftir 1-2 daga. Í einstaka tilfellum getur fólk ekki drukkið nægan vökva til að endurbæta vökvamissi vegna uppkasta og niðurgangs og getur þurft á læknisaðstoð þess vegna. Slíkt ástand getur einkum skapast hjá mjög ungum börnum, þeim sem eldri eru eða hjá fólki með sem veikt er fyrir.