Reglur sjúkrasjóða stangast á við regluverk almannatrygginga

 Úrskurður Úrskurðarnefndar Tryggingamála um tilhögun greiðslu endurhæfingarlífeyris setur Tryggingastofnun í talsverðan vanda. Málið er nú til skoðunar hjá Velferðarráðuneytinu og stofnuninni.

Fréttablaðið greindi í gær frá úrskurði Úrskurðarnefndar Tryggingamála í máli konu sem fékk sjúkradagpeninga til 8. júní í fyrra en TR taldi að hún ætti ekki rétt á endurhæfingarlífeyri fyrr en 1. júlí. Konan var því bótalaus í 22 daga. Úrskuðarnefndin komst hins vegar að þeirri niðurstöðu að greiða ætti lífeyrinn frá 9. júní eða degi eftir að hún varð bótalaus.

Sigríður Lillý Baldursdóttir forstjóri Tryggingastofnunar segir að í úrskurðurinn setji TR í töluverðan vanda.

„Vandi okkar við úrlausn þessa verkefnis er að hér mætast annars vegar reglur sjúkrasjóða stéttarfélaga sem byggja á dagpeningum og hins vegar regluverk almannatrygginga þar sem byggt er á mánaðarréttinum,“ segir hún og bætir við að allar greiðslur sem Tryggingastofnun hefur með að gera séu byggðar upp á mánaðarréttindum en séu ekki í formi dagpeninga.

Til grundvallar bótareikningi hvers mánaðar skuli leggja 1/12 af áætluðum tekjum ársins. Endurhífingalífeyrir sé tekjutengdur og ráðist greiðslur því af tekjum lífeyrisþega á mánaðargrundvelli.

Sigríður Lillý segir að úrskurður Úrskurðarnefndar Tryggingarmála krefjist því grundvallabreytinga á greiðslufyrirkomulagi endurhæfingarlífeyris og sé málið til skoðunar hjá Velferðarráðuneytinu.

„Fleira kemur til sem gerir stöðuna flókna. Skarist greiðslur sjúkrasjóða og Tryggingastofnunar innan mánaðarins geti það leitt til lægir heildargreiðslna til viðskiptavina. því sé afar mikilvægt að fara gaumgæfilega yfir þessi mál,“segir Sigríður Lillý.

Tryggingastofnun fellst ekki á að úrskurðurinn verði afturvirkur.

Magnús Nordahl yfirlögfræðingur Alþýðusambandsins hefur sagt að hann líti svo á að úrskurðurinn hafi ótvírætt fordæmisgildi og sé afturvirkur.