„Rétt að benda á tvískinnungshátt ríkisins í málinu“

„Ríkið er á móti innheimtu aðgangseyris að Geysissvæðinu en á sama tíma stendur hið opinbera fyrir innheimtu aðgangseyris á aðra ferðamannastaði, t.d. að Silfru á Þingvöllum,“ segir Bjarni Karlsson, formaður Landeigendafélags Geysis, í tilkynningu.

Þar segir að félaginu þyki rétt að benda á tvískinnungshátt ríkisins í Geysismálinu. Sýslumaðurinn á Selfossi lagði í dag lögbann á innheimtu gjalds á svæðið.

Bjarni segir lögbannsgerðinni hafa verið frestað í tíu daga. „Þá var á lögmanni ríkisins að heyra að vilji hins opinbera væri að ræða málið og leita lausna. Landeigendafélagið hefur hins vegar ekkert heyrt frá ríkinu, meðeiganda þess að landinu.“

Sýslumaðurinn á Selfossi gerði ríkinu að reiða fram tæplega 60 milljón króna tryggingu, sem skuli berast embættinu fyrir klukkan tíu að morgni miðvikudagsins 30. apríl. Annars falli lögbannið niður. Bjarni segir að berist tryggingin fyrir tilsettan tíma hafi ríkið viku til þess að þingfesta staðfestingu lögbannsins og þá geti meðferð málsins fyrir dómstólum hafist.

„Félagið telur nauðsynlegt að málið fari sína leið innan dómskerfisins því mikilvægt er að fá úr því skorið hvað eignaréttur landeigenda felur í sér og hvaða kröfur ríkið, minnihlutaeigandi, getur gert um yfirráð á svæðinu,“ segir Bjarni.

Þá segir hann að landeigendafélaginu þyki rétt að benda á tvískinnungshátt ríkisins í málinu. Hann segir ríkið vera á móti innheimtu aðgangseyris að Geysissvæðinu en standa á sama tíma fyrir innheimtu á aðra ferðamannastaði. Í því samhengi nefnir hann innheimtu að Silfru á Þingvöllum.

„Rökin fyrir þeirri gjaldheimtu eru þau sömu og við Geysi, verndun svæðisins, aðgangsstýring og uppbygging á aðstöðu fyrir ferðamenn,“ segir Bjarni.