Segir orka tvímælis að rukka inn á svæði Bláa lónsins

Talsmaður landeigenda á Geysissvæðinu segist ekkert hafa heyrt í fulltrúum ríkisins eftir að samkomulag náðist um að fresta því að krafa um lögbann á gjaldtöku yrði tekin fyrir í héraðsdómi. Fresturinn, tíu dagar, rennur út á morgun en tímann hafi ríkið ætlað að nýta til samræðu um málið.

Óhætt er að segja að gjaldtakan, 600 krónur sem landeigendur hófu að innheimta við Geysi í Haukadal, hafi fengið misjöfn viðbrögð hjá fólki. Ríkið sem er meðeigandi svæðinu fór fram á lögbann á gjaldtökuna en þann 16. apríl síðast liðinn hafði Ríkið frumkvæði að því að fresta því að málið yrði tekið fyrir í héraðsdómi.

„Það átti að nýta þann tíma til að eiga einhverjar samræður um málið en því miður höfum við ekkert heyrt frá þessu meðeigandi okkar,“ segir Garðar Eiríksson, talsmaður landeigenda á Geysissvæðinu í kvöldfréttum Stöðvar 2.

Garðar segist hafa vonast til þess að einhver árangur hefði getað orðið af þessum viðræðum en undrast tvískinnungshátt ríkisins í málinu. Ríkið sé á móti því að landeigendur innheimti gjald á Geysissvæðinu á sama tíma og þeir standi sjálfir fyrir gjaldtöku m.a við þjóðgarðinn á þingvöllum með sömu rökum og landeigendur haldi fram um verndun og uppbyggingu.

„Svo er þetta líka athyglisvert að ríkið er hluteigandi að svæðinu við Bláa Lónið í gegnum Orkuveitu Suðurnesja og þar er vissulega tekinn aðgangseyri sem ganga umhverfis það svæði án þess að fara ofan í lónið.“

Málið muni nú fara sína leið í réttarkerfinu og mikilvægt sé að fá úr því skorið. Ef menn sætti sig ekki við niðurstöðu héraðsdóms fari það fyrir Hæstarétt og því gæti niðurstaða ekki legið fyrir fyrr en seint á árinu.