Orkuveitan mikilvægasta verkefni borgarstjóra

Borgarstjóri segir málefni Orkuveitu Reykjavíkur vera mikilvægasta verkefni sem hann hefur ráðist í. Búið er að bæta úr 116 athugasemdum sem gerðar voru á rekstri fyrirtækisins árið 2012.

Ársfundur Orkuveitu Reykjavíkur fór fram í dag. Eins og greint var frá nýverið í kvöldfréttum Stöðvar 2 þá hefur rekstur Orkuveitunnar tekið stakkaskiptum og skilaði fyrirtækið rúmlega þriggja milljarða króna hagnaði árið 2013 ásamt því að grynnka á skuldum.

Árið 2011 var skipuð úttektarnefnd til að grafast fyrir um ástæður þeirrar grafalvarlegu fjárhagsstöðu sem fyrirtækið hafði ratað í. Greiningin leiddi í ljós 118 atriði sem þótti brýnt að lagfæra. Beindist gagnrýnin meðal annars að of miklum fjárfestingum, of háum arðgreiðslum miðað við afkomu, rýrnandi gjaldskrám, miklu gengistapi, og svo framvegins. Í dag hefur verið bætt úr öllum þessum atriðum nema tveimur sem eru í vinnslu.

Jón Gnarr borgarstjóri kveðst stoltur af þeim árangri sem náðst hefur á síðustu árum. „Ég lít á Orkuveituna sem mikilvægasta verkefni sem ég hef komið að á mínum borgarstjórnarferli,“ segir Jón Gnarr. Friður hafi skapast um málefni Orkuveitunnar á þessu kjörtímabili.

„Orkuveitan var mjög gjarnan bitbein í borgarstjórn en það heyrir sögunni til. Það ríkir sátt, friður og traust á Orkuveitu Reykjavíkur. Umfjöllun um OR er allt önnur en hún var. Hún er á jákvæðari og uppbyggilegra nótum en hún var áður.“