Sigur fyrir borgarbúa

Viðsnúningur í rekstri Orkuveitu Reykjavíkur er sigur borgarbúa. Þetta segir formaður borgarráðs. Skuldir Orkuveitunnar lækkuðu um 40 milljarða á síðasta ári.

Árið 2011 kynnti Orkuveita Reykjavíkur til leik aðgerðaráætlun, Planið svokallaða, til að bjarga rekstri fyrirtækisins. Planið virðist vera að ganga upp. Orkuveitan fékk lán frá eigendum sínum til að koma í veg fyrir sjóðþurrð um mitt ár 2011. Rekstur fyrirtækisins var þá í miklum ólestri. Aðgerðaráætlunin Planið var sett í gang og var stefnt að því að ná tilbaka 51 milljarði í lok árs 2016. Það hefur gengið vonum framar því nú er búið að ná meira en 80% þeirrar heildarfjárhæðar sem Planinu var ætlað að skila.

„Fyrirtækið var auðvitað í gríðarlegum vanda árið 2011 þegar við sjósettum áætlun okkar sem við köllum Planið. Það var fyrirséð að árið 2013 yrði erfiðast. Við erum komin standandi í gegnum það og staðið við allar okkar skuldbindingar,“ segir Bjarni Bjarnason, forstjóri Orkuveitu Reykjavíkur.

Rekstrarkostnaður lækkað gríðarlega

Skuldir Orkuveitunnar lækkuðu um tæpa 39 milljarða á síðasta starfsári. Nettóskuldir nema 186 milljörðum í dag og hafa lækkað um 48 milljarða á síðustu fjórum árum. Horfur í rekstri Orkuveitunnar eru nokkuð bjartar að mati Bjarna en tekist hefur að lækka verulega rekstrarkostnað fyrirtækisins.

„Rekstrarkostnaður hefur lækkað alveg gríðarlega og mun hraðar en við þorðum að vona. Auðvitað er fækkun starfsfólks hluti af því. Við höfum fækkað starfsfólki um 200 manns en það virðist ekki koma neitt niður á þjónustu fyrirtækisins,“ segir Bjarni.

Dagur B. Eggertsson, formaður borgarráðs, er afar ánægður með rekstrarafkomu Orkuveitunnar og hrósar starfsfólki fyrirtækisins.

„Það þurfti allt að ganga upp til þess að þetta ár gengi vel. Ég held að þetta sé sigur fyrir alla borgarbúa og eigendur orkuveitunnar,“ sagði Dagur B. Eggertsson.